Nakig-alayon na ang General Santos City Police Office (GSCPO) sa Tupi Municipal Police sa South Cotabato, aron masayran ang background sa duha ka mga biktima sa lain pang shooting incident sa siyudad, Biyernes sa gabii, July 9.

Sa pakighinabi, gisaysay ni GSCPO spokesperson, P/Major Rissa Hernaez nga ginasilip karon sa mga imbestigador ang tanang posibleng motibo sa pagpusil-patay sa mga biktima nga silang Ramineses Pangulo Guerero, 43-anyos ug Enrico Pangulo Guerero, 50-anyos, kanhing kagawad matod pa sa Barangay Kablon, Tupi, South Cotabato.

Base sa inisyal nga imbestigasyon, bag-uhay lamang nanihapon ang duha sa Harry's Kitchenette sa bahin sa Laurel North junction Quezon Avenue, sa dihang giduulan sa naka-motorsiklo nga mga suspeks, dayon sa maong pagpusil.

Nahitabo ang insidente takna alas-6:30 sa gabii.

Una nang migawas ang impormasyon nga bag-uhay lamang nakagawas sa presuhan ang maong kagawad gumikan sa matod pa kalambigitan sa ginadiling droga.

Lakip sa ginasilip karong motibo ang kalabutan sa illegal drugs ug politika sa maong krimen.
(John Rey Somido)