Cebu City -  Gitakdang ko dispatch ang Environmental Management Bureau (EMB)-7 ug team nga mo coordinate ni Barangay Inayawan Cebu City, Captain Kirk Bryan Repollo alang sa joint inspection sa garbage transfer station sa barangay, Lunes, Hulyo 5, 2021.

Gihangop ni Repollo ang maong kalamboan tungod kay ang problema sa barangay gihulagway niya nga miabot na sa alarming level.

Matod sa opisyal nga ang baho gikan sa transfer station miabot na sa Barangay San Roque, Syudad sa Talisay- nga utlanan sa Syudad sa Sugbo ug sa Dakbayan sa Talisay.

Gibutyag ni Repollo nga daghan na kaayo ang mireklamo sa ka baho, gani  sa ilang barangay, mga usa ka kilometro gikan sa transfer station masimhot ang ka baho sa basura.

Nabalaka kini ang bukid sa basura mamahimong modahili, labi na ning panahon sa ting uwan, ug peligro kini sa mga mamasurahay.

"Kuyaw ug mo landslide na lang ug kalit nganha unya simbako naay mga waste pickers nga matabunan," kabalaka ni Repollo.

Tumong sa ipahigayong inspection sa Lunes, matod ni EMB-7 Director Lormelyn Claudio aron mapakgang ang bisan unsang insidente sa transfer station.

Ang mga basura nagliondok sa transfer station human ang operator sa landfill sa Barangay Binaliw , ARN Central Waste Management Inc., wala na mopalabay sa private sa Syudad sa Sugbo nga mao ang Docast Construction /JJ & J Construction and General Services sukad niadtong Hunyo 19, 2021.

Nag ugat ang kontrobersya sa kasungian sa bayranan sa Docast nga sa Landfill operator nga mokabat ug ₱ 18 milyones. (Jhon Tadlip/JTY)

(News & photo courtesy of EMB-7 | Barangay Inayawan LGU)