Gutgutiguten ni Gob. Matthew Marcos Manotoc dagiti kailian nga itultuloy ti agmula iti marunggay kadagiti bukod nga arubayan.

Segun iti gobernador, napintas iti mula a marunggay gapu ta adu ti maited na a benepisio iti salun-at ti maysa a tao.

Segun pay iti gobernador, napigsa pay a panglaban daytoy iti aniaman a sakit kangrunaanna iti novel corona disease.

Daytoy ket paset pay laeng ti panangsuporta ti gobernador iti immunan a tignay iti gobierno ti suidad ti Laoag a panagmula ti marunggay kadagiti nagduduma a barangay.

Maipalagip nga inyuswat ti Laoag iti Marunggay Festival itay kallabes a nakipartisiparan dagiti nagduduma a punong barangays ken opisiales pakairamanan dagiti kameng ti Sangguniang Panglungsod.

Daytoy ket nailinya pay laeng iti panangrambak ti Environment Month Celebration iti suidad ti Laoag ken ti probinsia ita a bulan ti Hunyo.

Nagapela manen ti gobernador a nasken a pasantaken ken paberdien ti aglawlaw kas maiyataday pay laeng iti programa a Narimat nga Aglawlaw.  (Cita Macalipis, RPN DZRL Batac Correspondent)

(Source: Provincial Government of Ilocos Norte)