Sa tinguha nga mapalapdan pa ang programa sa edukasyon diin makabenepisyo ang mga kabataan, gitugotan sa syudad nga magamit sa University of Science and Technology of Southern Philippines kon USTP-CDO ang tipik sa luna sa syudad diha sa Barangay Balubal isip extension sa ilang school campus.

Alayon niini, mipirma og Contract of Usufruct agreement ang syudad pinaagi ni Mayor Oscar Moreno uban ni Dr. Ambrosio B. Cultura II, University System President sa USTP, adlaw'ng Martes, Hunyo 29.

Kini human gitugotan usab sa City Council pinangulohan ni Vice Mayor Raineir Joaquin Uy ang mayor nga molambigit ug molagda sa maong kasabutan pinaagi sa usa ka ordinansa.

Gibutyag ni Dr. Cultura nga kursong Agriculture, Information Technology, ug Education ang itanyag sa USTP sa higayon nga matukod na ang ilang school campus didto sa Balubal.

Nunot niini, nagpasalamat si Dr. Cultura kang Mayor Moreno ug sa Konseho sa maong kahigayonan nga gihatag ngadto sa USTP.

Kini nga kalambuan ang gikalipay ni Mayor Moreno ilabina sa kapasidad sa USTP sa paghatag og maayong mga programa sa edukasyon sa ilang mga tinun-an.

"This makes education more affordable and proximate to the people," dugang ni Mayor Moreno.

Samtang mipadayag usab sa iyang kahinam ug kalipay si PB Bactong nga anaa na sa ilang barangay ang maong tunghaan.

Basi sa kontrata, gamiton sa USTP ang mokabat 10,000 square meters nga yuta sa syudad sulod sa 25 ka tuig ug renewable sa lain na usab nga 25 ka tuig sigun sa kasabutan sa duha ka partido.

Ang contract signing gisaksihan nila ni City Councilor Suzette Magtajas-Daba, ug mga sakop sa konseho sa Barangay Balubal pinangulohan ni Punong Barangay Pablo M. Bactong.
(ALR, photo courtesy by Roel Felicitas, CIO)