Daw nagalupad nga mga lungon ang mga helikopter ug eroplano sa Armed Forces of the Philippines (AFP). Milagapak niadtong Hulyo 4 ang usa ka C-130 Hercules transort plane sa militar sa Barangay Bangkal, Patikul, Sulu, nga nagresulta sa pinakadakung kaswalti sa milabayng tulo ka dekada.
Matud sa pinakaulahing taho, mikabat na sa 52 ang kumpirmadong namatay lakip ang 49 ka sundalo ug tulo ka residente sa Sityo Amman sa maong barangay. Mikabat sa 53 ang samaron ug ginatambalan karon, kung asa 49 ang sundalo ug upat ang sibilyan.
Ang maong segunda-manong eroplano gipalit sa rehimen niadto lamang Enero sa US. Nagamit na ang kasagaran sa mga himang iggugubat sa AFP, lakip ang mga barko ug eroplanong gigamit pa niadtong Ikaduhang Gubat Pangkalibutan ug sa gyerang agresyon sa US sa Vietnam gikan dekada 1960 hangtud 1970.
Nahitabo ang insidente pipila ka adlaw human gipaundang ni Defense Secretary Delfin Lorenzana niadtong Hunyo 24 ang pagpalupad sa mga Black Hawk helicopter human nga nahagba ang usa niini sa usa ka misyong pagbansay sa Capas, Tarlac.
Mihagba ang combat utility helicopter niadtong Hunyo 23 sa gabii human mag-take off kini gikan sa kanhing base militar. Pagka-ugma, nakaplagan sa mga grupo sa search and rescue ang helikopter sa Crow Valley, Tarlac. Patay tanan ang unum nga sakay niini.
Ang nahagsa nga S-70i Black Hawk ang usa sa 16 nga gipalit sa Pilipinas sa Poland niadtong 2019. Ang unum niini, lakip ang nahagsa, miabot sa nasud niadtong Nobyembre 2020. Miabot ang lima pa ka helikopter niadtong Hunyo ug ang ulahing bats niadtong katapusan niing tuiga.
Lakip ang gipalit nga 16 ka Black Hawk sa $241-milyong kontrata (o ₱11.8 bilyon sa bayloay nga $1=₱48.85) tali sa gubyerno sa Pilipinas ug sa Poland nga giaprubahan niadtong 2019. Hinimo kini sa PZL Mielec sa Poland, subsidyaryo sa kumpanyang US nga Lockheed Martin. (Napugos nga mopalit sa Poland ang Pilipinas tungod kay gibalibaran kini sa gubyerno sa Canada tungod sa grabeng rekord sa paglapas sa tawhanong katungod sa rehimeng Duterte.)
Sa kinatibuk-an, adunay 18 ka patay ug upat ka samaron sa mga piloto ug sundalo sa sunud-sunod nga pagkahagba sa helikopter sukad niadtong Hulyo 2020 hangtud Hunyo 23 niining tuiga.
Niadtong Hulyo 2020, upat ka mga piloto ug sundalo ang napatay ug usa pa ang samaron human mitiurok ang usa ka Huey helicopter samtang nagalupad sa usa ka pagbansay sa gabiing operasyon sa amihanang Luzon.
Pagsugod sa 2021, mihagba usab niadtong Enero ang usa ka UH-1H Huey helicopter sa 205th Tactical Helicopter Wing sa Bulonay, Impasug-ong, Bukidnon. Patay ang pito ka sakay niini. Nagasuporta kanhi ang helikopter sa operasyong kombat sa 8th IB batok sa Bagong Hukbong Bayan.
Niadtong Abril, namatay ang usa ka piloto sa Philippine Air Force samtang nasamdan ang tulo pa human nahagba ang ginasakyang MG520 helicopter gunship sa 15th Strike Wing sa lungsod sa Jetafe, Bohol.
WordPress.com
No comments:
Post a Comment