Pormal nga gilusad ang Philippine Identification System (PhilSys) sa Philippine Statics Authority (PSA) dinhi sa dakbayan sa Dipolog kagahapon, Hulyo 15, 2021 sa may alas 9:00 ang takna didto sa bag-ong City Hall Building ning dakbayan.

Ilawom sa Akta Republika numero 11055 o nailang "The Philippine Identification Act", ang PhilSys gimugna alang sa pagpatuman sa "Single National Identification System" alang sa tanang mga Filipino lakip na ang "resident aliens" dinhi sa nasud.

Ang Philippine ID mao na unya ang gamiton alang sa mga pribado ug pampublikong transaksyon sama sa pagkuha og bank account, pagpa-enroll sa mga tulonghaan ug uban pa.

Sa gipahigayong paglusad niini, gibutyag ni CCS Ma. Lila D. Daan, nga ilang paga- hatagan og prayoridad ang mga Step 1 registrants kinsa na-accommodate ug na-interview na alang sa Step 2 registration. Sa pagproseso sa Step 2, himuon na unya ang biometric procedure sa mga magparehistro.

Dugang ni Daan nga gahapon adlawa, Huwebes (Hulyo15) hangtod sa adlaw'ng Sabado(Hulyo 17), ang mga empleyado sa kagamhanang lokal sa Dipolog maoy ilang irehistro og kini magapadayon hangtud sa sunod semana alang sa mga "walk-in" registrants.

Samtang sa tipik sa mensahe ni Mayor Darel Dexter T. Uy, siya miingon, "The City Government of Dipolog is therefore proud, not only as a supporter, but as a pro-active partner of this initiative by the administration of President Duterte, to simplify public and private transactions in line  with the government's drive to curtail bureaucratic redtape."

Human sa hamubong programa, gipahigayon gilayon ang blessing sa nasangpit nga PhilSys Registration Center diin kini gitamboangan nila ni Mayor Uy, Vice-mayor Horacio Velasco, City Councilors Peter  Y. Co ug Praxides P. Rubia, Ms. Lila Daan ug mga personahe sa pipila ka mga buhatan sa kagamhanang lokal ning siyudad.

(News and photo courtesy of CITY INFORMATION OFFICE, DIPOLOG CITY GOVERNMENT Facebook page)