Subling gilakip sa Financial Action Task Force (FATF) niadtong Hunyo 24 ang Pilipinas sa ginatawag niining "grey list" o listahan sa mga nasud nga kaylap ang money laundering. Buut ipasabot, ipailalum sa FATF sa mas hugot nga pagmonitor ang mga bangko ug pinansyal nga mga transaksyon sa nasud.
Ang "money laundering" mao ang paglimpyo sa hugaw nga kwartang nakolekta gikan sa mga iligal nga aktibidad pinaagi sa pagbalhin-balhin niini sa mga bangko o pagtagana niini sa mga lehitimong negosyo. Ang FATF usa ka internasyunal nga organisasyong kontra-money laundering nga gitukod sa G7. Unang nabutang sa black list sa FATF ang Pilipinas niadtong 2000 ug sa grey list niini niadtong 2012.
Gihimo sa FATF ang restriksyon luyo sa mga amyendang gihimo ni Rodrigo Duterte sa Anti-Money Laundering Act niadtong Pebrero ug pag-apruba sa Anti-Terror Law niadtong Hunyo 2020 nga nakapukos kuno sa pagsumpo sa "pagpondo sa terorismo." Wala gitumbok sa parehong balaod ang mayor nga mga krimen nga tinubdan sa hugaw nga kwarta—ang patigayon sa iligal nga droga ug korapsyon.
Niadtong 2019, gituki sa Anti-Money Laundering Council (AMLC) ang 161,650 suspicious transaction report (report sa gidudahang transaksyon o STR) sukad Enero 2013 hangtud Disyembre 2017 nga nagkantidad og ₱17.9 trilyon. Nasuta niining 12,508 sa mga STR nga adunay kantidad nga ₱10 trilyon gikan sa pagbaligya sa iligal nga droga ug kalambigit nga mga krimen. Katunga sa kantidad (₱5 trilyon) ang gitaho sa unang tuig sa "gyera kontra-droga" sa rehimeng Duterte. Sa tunga-tunga sa 2015 ug 2016, misaka sa halos 200% ang kantidad sa mga transaksyong adunay kalabutan sa iligal nga droga. Bisan og miubos sa 2017, nagpabiling taas ang ihap sa mga transaksyon kumpara sa 2014. Ang STR mao ang mga taho nga ginasumite sa AMLC kalabot sa mga transaksyong ginadudahang nagalimpyo sa hugaw nga kwarta.
Halos tanang mga transaksyong gituki miagi sa lokal nga mga bangko. Adunay bahin sa nalimpyong kwarta (29%) nga migawas padulong sa US, Costa Rica, Malaysia ug Nigeria apan dakung bahin niini ang mituyok lamang sulod sa nasud.
Sa usa ka mas malangkubon nga pagtuon nga gipagawas sa AMLC niadtong 2020, misaka ang ihap sa mga gidudahang transaksyon og halos 11 ka beses gikan 2013 hangtud 2020. Sa tunga-tunga pa lang sa 2019 ug 2020, gibanabanang misaka kini og 68% o gikan 623,000 ngadto sa 1.01 milyon.
Gikan 2012 hangtud sa kasamtangan, ginaila sa mga internasyunal nga ahensyang nagamonitor sa internasyunal nga merkado sa iligal nga droga nga "seryosong hisgutanan" ang money laundering sa Pilipinas. Sa 2021 International Narcotics Strategy Report sa US nga gipagawas niadtong Marso, gisulti niining ginagamit sa mga Chinese nga sindikato ang Pilipinas isip rehiyunal nga bangko ug daluyan sa iligal nga droga ug hugaw nga kwarta gikan dinhi. Ang maong mga sindikato ang nagasuplay sa nagkadakung bolyum sa shabu alang sa lokal nga merkado. Sa taho sa AMLC, anaa sa 54% sa mga STR nga nasumite gikan Enero 1 hangtud Setyembre 2020 lambigit sa patigayon sa iligal nga droga.
Gawas sa internasyunal nga operasyon sa mga sindikato sa droga, taas usab ang ang-ang sa korapsyon sa mga upisyal sa gubyerno ug kaylap ang human trafficking sa Pilipinas—mga krimen nga tinubdan sa hugaw nga kwarta. Napadali ang paggawas-sulod sa hugaw nga kwarta nga ginatampo sa dakung bolyum sa remitans sa mga migranteng Pilipino. Gawas sa lokal nga mga bangko, ginalimpyohan ang hugaw nga kwarta sa mga pribadong negosyo, partikular sa mga kasosyong kasino. (Isa sa adunay pinakadakung pasugalan sa nasud ang mega-kroni ni Duterte nga si Enrique Razon. Aduna usay kontrata ang usa pa ka kroni ni Duterte nga si Dennis Uy nga magtukod og higanteng kasino sa Cebu.)
Sa laing taho sa Securities Exchange Commission (SEC), gipunting ang pagpangawkaw ug korapsyon isip mayor nga tinubdan sa hugaw nga kwarta nga nagasulod sa sektor sa pinansya gikan 2017 hangtud 2019. Gikan sa lokal nga korap nga mga pulitiko ang bulto sa hugaw nga kwarta, pero aduna usay pipila nga gidudahang gikan sa China. Matud pa sa SEC, "hilabihan ka ubos o wala" kini namonitor nga pondong "nagasuporta sa terorismo."
WordPress.com
No comments:
Post a Comment