Cebu City - Gi-aprobahan na gyud sa konseho sa Syudad sa Sugbo homan sa taas taas nga higayon ang dul-an sa P4.5 billion nga Supplemental Budget No. 1 (SB-1) nga gi propose ni Cebu City Mayor Edgar Labella, kagabii Hulyo 28, 2021.

Homan sa 7-hour session nga gisugdan alas 2 sa hapon hangtud sa alas 8 kagabii, gi desisyonan sa konseho ang pag approve sa supplemental budget nga naglakip sa gahin sa nalangay nga sweldo sa medical workers sa syudad, pagpahuman sa Cebu City Medical Center (CCMC), dugang gastohan alang sa vaccination ug Covid-19 response ug ang bayranan sa buhis sa Bureau of Internal Revenue (BIR).

Ang majority bloc pinanguluhan ni majority floor leader, Councilor Raymond Garcia, mi aprobar sa budget, ug napildi ang minority floor sa duha ka botos, sa final results nga 8-6 pabor sa majority block.

Sa iyang bahin, si Minority floor leader, Councilor Nestor Archival, nagkanayon nga daghang mga allocations sa budget nga kinahanglang i scrutinize sama sa P1 billion nga gahin sa pagpahuman sa CCMC ug ubang dili dinalian nga gastohan.

"Nganong magdali man ta. Kwarta man ni sa mga tawo. We don't play games here," matod ni Archival.

Si Konsehal Eugenio Gabuya, Jr., laing minority floor leader, mipasabot nga ang pagpasar sa SB-1 sama ra nga gihutdan ang nahibilin nga saving sa syudad tungod kay kuhaon kini gikan sa nahabilin nga halin sa South Road Properties (SRP) lots.

"Just a manifestation, Mr. Chairman. If we pass this budget, hurot na atong SRP funds. Kung naa may pandemic sunod, wala na tay kwarta," padayag ni Gabuya.

Alang kang Councilor Franklyn Ong, presidente sa Liga ng mga Barangays (LNB), nga wala kinahanglana ang dinalian nga pag approve sa city council tungod kay, matod pa dunay igong higayon "to peruse the budget."

Pero si Councilor Garcia nagkanayon nga committee on budget and finance mi scrutinized na sa budget sa duha ka higayon, gani gi-uli kini alang sa dugang adjustments.

"The budget hearing was the time to ask questions. Everyone was invited to be there," sigon pa ni Garcia

Gibarugan ni Archival ang budget hearing wala magpasabot nga ang konseho dili na maka higayon "to persuse the budget again afterward."

Human gi raise ni Archival ang iyang objection, nahitabo ang botohan nga mi resulta sa pagpabor sa majority floor sa pagpalabang sa budget.

Sa sayo pa, misaad si Garcia nga mapasar ang budget tungod kay nagpaabot na ang mga medical workers sa nalangay nila nga sweldo.

Una niini gipadayag ni Cebu City Acting Mayor nga naa na sa kamot sa konseho ang hisgutanan sa sweldo sa mga JO medical workers, nurses ug drivers.  (Jhon Tadlip)

(News & photo courtesy of Cebu City Council)