Pagadian City - Way swerteng nadakpan ang suspek sa pagpayuhot ug ilegal nga droga didto sa Sta. Lucia District, Pagadian city.

Pinaagi sa hiniusang pwersa sa PDEA ug PNP, atol sa gipahigayon nga Anti-illegal Drug Operation kagahapon, Hulyo 18, 2021, nasikop ang usa ka Marjhonie Montejo Hinoguin, hingkod ang pangidaron ug residente kini sa Purok Riverside, sa naasoyng dapit.

Narekober sa mga otoridad ang usa (1) ka heat-sealed transparent plastic sachet ug trese (13) ka heat-sealed transparent plastic sachet nga adunay mga sulod nga white crystalline substance nga gituohan nga shabu. Mubalor ngadto sa 6mil kapin ka pesos ang kantidad niini nga mitimbang sa usa (1) ka gramo.

Nakuha usab gikan sa kamot sa suspek ang usa (1) ka Marlboro Cigarette pack nga maoy gisudlan matud pa sa illegal nga droga ug usa (1) ka Five Hundred Peso Bill (₱ 500.00) isip buy-bust money.

Gidala na sa ZNPPO crime laboratory ang mga narekober nga paraphernalia alang sa dugang imbestigasyon samtang ang dinakpan ang anaa na karon sa kustodiya sa Pagadian city police station, nagpaabot sa kasong ipasaka batok niini. (Sam Legaspi)

(Source: Public Information Office – Police Regional Office IX, photo courtesy of Pagadian Icon)