Gipahigayon kagahapon, Hulyo 7, 2021 sa may alas 9:00 ang takna ang panagtigum sa mga nagkalain-laing kahugpungan sa Motorcab drivers dinhi sa dakbayan nga gipahigayon didto sa 2nd floor, Incident Command Post, ning siyudad.

Ang maong panagtigum ang gipatawag sa buhatan sa Traffic Management, City Legal, uban sa pagtambong usab ni Permits and License Division Chief sa buhatan sa Mayor nga si Ms. Viola A. Pino.

Sigun sa nasayran, nga katuyu-an sa maong panagtigum mao ang subling pagpahibalo ngadto sa sektor sa motorcab drivers ning siyudad kalabot na sa unod sa Ordinansa no. 20-299 nga nag-amendar sa Ordinansa no. 107 (Traffic Code of Dipolog City) partikular na sa probisyon kalabot sa pihong taripa sa bag-ong plitihan ug sa bug-at nga silot kalabot sa paglapas niini.

Atol sa maong panagtigum, gituki ni TMO Traffic Incharge, Felipe Mangila ngadto sa mga kahugpungan ang kalabot sa gitakdang taripa sa plitehan dinhi sa dakbayan ilawom sa maong ordinansa, diin usa usab sa gitutokan mao ang aprubadong pletihan dinhi sa city proper nga P10 pesos, lakip na ang gidesignar nga mga utlanan sulod sa city proper.

Samtang sa kabahin ni Ms. Viola Pino, kansang buhatan maoy in-charge dinha sa prankisa sa tanang mga motorcabs, siya ang mibatbat usab sa kamahinungdanon sa akreditasyon alang sa mga motorcab drivers alang sa ilang kaayohan sa umaabot nga mga adlaw.

Samtang gibatbat usab ni Atty. Kevin Limbaga sa City Legal Office ang pipila ka mga pontong legal kalabot na sa operasyon sa mga motorcabs, lakip na ang mga posibleng silot sa mga kalapasan nga mahimo unya niini batok sa nahisgotang ordinansa.

Human sa pipila ka mga pagpasabot nga gihimo sa mga nahisgotang ahensiya sa unahan, gipahigayon ang open-forum, aron sa paghisgot ug pagpaminaw usab sa mga sugyot o mulo gikan sa habig sa mga hingtundang motorcab drivers.

Human sa pipila ka mga diskusyon, subli nga gi-awhagan ang mga motorcab drivers sa pagsingil sa plitehan nga gitakda sa ordinansa, tungod kay mao kini ang aprubadong singilan sa gitakda sa maong ordinansa, partikular na dinhi sulod sa city proper.

Kalabot niini, isip demokratikanhong proseso, gikalatid nga mopadangat ang kahugpungan sa mga motorcab drivers sa ilang sulat hangyo ngadto sa buhatan ni City Mayor Darel Uy ug sa Sangguniang Panlungsod alang sa temporaryong pag-suspenso sa pagsingil sa aprubadong taripa sa plitehan, sa rason nga tag duha lamang ka pasahero ang gitugot kanila nga mokarga og mga pasahero ning panahon sa pandemya.

Subay ning maong lakang, dugang usab nga gipasabot ni Mangila nga samtang wala pa sila makapadala sa ilang sulat hangyo ning kasamtangan, obligado ona silang mosingil sa gitakda nga aprubadong taripa alang sa ilang mga rota sa pagka-karon, partikular na dinhi sulod sa city proper nga tag 10 pesos lamang, diin mao kini karon ang nahimong sentro sa mulo gikan sa sektor sa sumasakay'ng publiko.

Gitapos ang nasangpit nga panagtigum nga mibunga og maayong resulta alang sa habig sa kagamhanang lokal  ning dakbayan ug sa mga  kahugpungan sa motorcab drivers human mihimo sa mga dugang pagpatin-aw ug pagpasabot nga mga hingtungdang buhatan sa unahan.

Kalabot ning maong kalamboan,  gilaoman nga aduna pa'y laing panagtigum o kaha public hearing ang ipatawag alang sa mga kadagkuan sa mga  motorcab drivers association sa mosunod nga mga adlaw sa unahan, aron makab-ot ang maayong koordinasyon tali sa kagamhanang lokal ning dakbayan  ug sa sektor sa mga motorcab drivers ug operators dinhi sa atong siyudad. Lakip sa mitambong sa maong tigum ang si PLT. Alan Elopre, ug kauban sa Dipolog City Police Station.

(News and photo courtesy of DIPOLOG CITY GOVERNMENT Facebook page)