Nakighimamat si DILG Undersecretary for Mindanao Affairs and Special Concerns Marjorie Jalosjos sa mga membro sa Incident Command System sa Local Task Force dakbayan sa Dapitan didto sa Amphitheatre, New Government Center.

Pamahayag pa ni USec Jalosjos atubangan sa mga mitambong nga ang ahensya sa Department of Interior and Local Government (DILG) buot maniguro sa luwas ug hapsay nga proseso ug pagpahimutang sa mga vaccination area.

Sumala pa nga kung unsa ang nahinagbo nga mga problema ug kabalaka sa mga katawhan angayan lamang masayran sa nasudnong pangagamhanan aron mahatagan kini sa dakong pagtagad ug solusyon.

Lakip sa gihingusgan ni USec Jalosjos mao ang adbokasiya sa mga kabarangayan nga kinahanglan magsul-ot sa face mask ilabina kay nakasinati sa pagtaas sa mga magpositibong kaso ang dakbayan sulod sa pipila ka mga semana.

Gumikan niini, gipaabot usab sa mga membro gikan sa mga nagkadaiya nga buhatan ug ahensya sa gobyerno ang ilang mga nahinagbo nga kasinatian ug nahimo sulod niini nga panahon sa pandemya.

Gisubay ni USec Jalosjos kauban ni Dir. Paisal Abutazil, DILG IX Regional Director ug Dir. Oliver Ombos, DILG ZDN Provincial Director ang kahimtang sa pagpatuman sa vaccination program sa dakbayan ug aron masuta kung unsa ang klase sa suporta nga gikinahanglan sa pagpadayon nga mga paningkamot sa pagbakuna kontra COVID-19.

(News and photo courtesy of CITY INFORMATION DIVISION CID-DAPITAN Facebook page)