Gipahigayon kaniadtong Agosto 5, 2021 sa may alas 2:00 ang takna sa hapon ang "CITY IATF EMERGENCY MEETING IN PREPARATION FOR VARIANTS OF CONCERN/SURGE" didto sa 2nd floor, ICP Building dinhi sa dakbayan.

Ang nasangpit nga tigum ang gidumala ni Incident Commander, Atty. Arvin L. Bonbon, uban ni City Mayor Darel Dexter T. Uy, ug mga personalidad gikan sa mga nagkalain-laing buhatan nga milangkob sa Dipolog City Inter Agency Task Force (IATF) ning dakbayan.

Sigun sa dugang nasayran, nga ang pagpahigayon sa nasangpit nga tigum ang nagatumong sa pagsayod sa mga kabag-ohan o "updates" kalabot na sa kasamtangang sitwasyon sa COVID 19 dinhi sa atong dakbayan, ug sa pagmugna og hugot nga mga lakang alang sa dugang pagpanalipod sa atong mga katawhan batok sa presensiya sa "Delta variant" nga nakasulod na dinhi sa atong nasud.

Gihisgotan sa maong tigum mao ang A) COVID 19 Status B) CONTACT TRACING/QUARANTINE C) VACCINATION CONCERNS D) HOSPITAL/TTMF/BIU CONCERNS E) BORDER/QCP CONCERNS ug uban pa.

Ning kasamtangan, nasayran gikan kang Dr. Benson Panaguiton (Doctor to the Barrio/Rural Health Physician) ning dakbayan, nga gumikan sa hugot nga paningkamot sa liderato ning atong dakbayan dinha sa pagpakigbatok sa COVID 19, ang atong dakbayan ang nagbaton na lang ning kasamtangan og 27 ka mga COVID 19 positive, human ang uban nga nagpositibo kaniadto ang naka-fully recovered na gikan sa maong makuyaw nga sakit.

Lakip sa gituki mao ang pagmugna sa dugang mga maayong sistema dinha sa mga vaccination centers, aron kapunggan ang pagduot sa mga katawhan nga magpa-bakuna, ingon usab sa padayong mapa-sunod sa social distancing, sigun sa nahimong obserbasyon sa miagi.

Dugang usab sa nasayran, nga  bisan og dunay pag-os-os sa atong kaso sa Covid 19 dinhi sa siyudad, apan padayon gihapong bukas ang atong mga ospital, Temporary Treatment and Monitoring  Facilities (TTMF), lakip na ang mga Barangay Isolation Units (BIUs) sa tanang panahon ning pandemya, alang sa dugang pag-alagad sa mga katawhan.

Samtang dugang nasayran nga mihimo usab sa mga gikinahanglang pagpanambal ang atong mga tambalanan pinaagi sa pagbaton sa mga igong gamit og tambal (antibiotics) aron sarang magamit sa mga magpositibo nga ma-confine.

Lakip usab sa gilantaw nga paga-pahugtan mao ang mga Quarantine Control Points (QCP) dinhi palibot sa dakbayan. Matud pa nga gawas sa atong mga Provincial Boundary Checkpoints kinsa dugang mipahugot sa ilang pagbantay karong panahona batok sa mga mosulod dinhi sa atong lalawigan, aron kabantayan ang kahimtang sa mosulod dinhi gikan sa laing  mga dapit gawas ning lalawigan, uban sa pagpadayon usab sa City IATF ang atong checkpoints sigun sa gitugot sa orden ehekutibo sa atong lalawigan, isip ayuda sa atong pagbantay sa mga mosulod ug mogawas nga mga katawhan, apan kini ang magsilbing "Security Checkpoints", nga mamahimong makasita usab sa mga kadudahang mga tawo o sakyanan nga mosulod dinhi sa atong siyudad. Lakip usab nga gibantayan mao ang atong mga kabaybayonan batok gihapon sa illegal unya nga pagsulod dinhi sa atong dakbayan pinaagi sa Philippine Coast Guard (PCG), basi sa taho, nga adunay uban usab nga mosulod pinaagi sa dagat.

Kahibalo-an nga kining maong panagtigum ang gipatawag sa City IATF aron hiniusang mohisgot alang sa paghimo sa mga hinanaling pagpangandam sa nabani-og karon nga mga local transmission sa mas makuyaw nga Delta Variant.

Gawas nila ni City Mayor Darel Dexter T. Uy ug ICP Commander, Atty. Arvin L. Bonbon, mitambong usab sila si Liga nga mga Barangay President, Hon. Julilus Gajonera, Police Chief, PLTC. Khisna  Asaali, PO3 Mark Tumpag sa Phil. Coast Guard, City Fire Marshal, FSI Edgar Quitoy sa BFP, City DILG. CLGOO Sherrie Machutes, Corazon Aquino Hospital, Hospital administrator Designate, Dr. Michael Te, Doctor to the Barrio, Dr. Benson Panaguiton, City Health Officer, Dr. Rowel J. Mata, Mr. Edwin Bation sa CDRRMO, PDEA Provincial Team Leader, Agent Marvin Santos, Ms. Donabelle Mutia sa CHO, Ms. Sheridan Bagarinao ug Rosie Serena, sa City Epidemiology and Surveillance Unit (CESU) ug uban pa.

(Source: DIPOLOG CITY GOVERNMENT Facebook page)