Davao Oriental - Misurender na ngadto sa otoridad ang duha ka mga piniriso kinsa mipuga gikan sa Davao Oriental Provincial Jail niadtong milabay nga Sabado, Agosto 14, 2021. Giila ang duha ka mga misurender nga sila Laudico Lintuan ug Gil Suga-an nga pulos adunay kasong R.A. 9165 o Comprehensive Dangerous Drugs Act of 2002.

Gitug-an sa duha nga ang grabeng kamingaw maoy usa sa hinungdan nga mipuga sila gumikan kay sugod sa pandemya gidili  na ang pagbisita sa Davao Oriental Provincial Jail apil na niini ang pagkalangay sa pagtaral sa ilang mga kaso.

Gipresenta ang duha ka misurender ngadto kang Governor Nelson Dayanghirang niadtong lunes, Agosto 23, sa mismong opisina sa gobernador kauban sila Tarragona Mayor Nestor Uy, kung diin sila unang misurender, Davao Oriental Provincial Police Director Colonel Efren Orlina ug Provincial Jail Warden Apollo Conde.

Ibalik usab ang duha ka mga detainee ngadto sa Provincial Jail kung mahuman na ang ilang medical ug swab testing. Gimando usab ni Gov. Dayanghirang ngadto kang Jail Warden Conde nga mas pahugtan pa ang siguridad sa presohan.

(Source: Davao Oriental Public Information Office)