Dakkel ti panagyaman ni Ilocos Norte Gob. Mathew Marcos Manotoc iti Dep Ed Regional Office gapu ti panangipalubos da a mausar dagiti pagadalan a temporaryo nga isolation unit ken field hospital ti Mariano Marcos Memorial Hospital and Medical Center.

Kuna ti gobernador nga immunan nga inaprobaran ti Dep Ed Region One a mausar ti Catalino Acosta Memorial Elementary School wenno CAMES iti Batac City kas temporary field hospital 3 iti MMMH &MC.

Inpalgak na a ti Imelda Cultural Center iti Batac ti immunan a kinita ti Batac Hospital ngem napinpintas nga iti CAMES kas maysa nga operational a pagadalan.

Iti agdama, manarimaanen ti pannaka-set up iti nasao a pagadalan kalpasan nga inbilin na ken ni Provincial Engr. Luciano Domingo a tumulong ken nakikammayet metten Dr. Lourdes Otayza, chief of Hospital iti MMMH &MC.

Nupay kasta, kunana a sabsabali ti CAMES gapu ta mapagbalin a field hospital, ti dadduma ket mausar nga isolation center ken ti dadduma ket mausar met nga vaccination center.

Inbunannag ti gobernador nga immunan ti Bangui a nagusar iti pagadalagan ken ti Dumalneg pakairamanan iti Dingras a nangkiddaw met iti Dep Ed Region One a mausar pay laeng ti Dingras National High School nga isolation facility.

Innayon iti ama ti probinsia a kinasarita na metten ti Regional Director ti Dep Ed para iti alisto a pannaka aprobar dagiti dadduma pay a pagadalan a makiddaw a temporary a mapagbalin pay laeng nga isolation unit nangruna kadagiti ili nga adu iti kaso na ti covid 19. (Cita Macalipis, RPN DZRL Batac Correspondent)

(Source: Provincial Government of Ilocos Norte)