Nikantidad og hapit onse milyones ka pesos (₱ 11M) apil mga modernong kagamitan ug working capital.

Gipangunahan mismo ni Governor Steve Chiongbian Solon ang pormal nga pag-turnover sa duha (2) ka brand new nga sakyanan, usa ka 6-wheeler hauling truck ug usa ka 10-wheeler delivery truck, nga siguradong magamit sa SAVESEGROW kon Sarangani Vegetable Seed Growers Multi-Purpose Cooperative. Lig-ong kooperatiba kini sa mga mag-uuma naka-basi sa Barangay Malandag, Malungon Sarangani Province.

Ang turnover nahitabo atubangan sa Kapitolyo sa Sarangani aron masiguro ang physical distancing sa mga nitambong. Kuyog sa Gobernador ang Department of Agriculture tungod hiniusang programa man kini kauban ang PRDP o Philippine Rural Development Project kaabag ang international financial institution nga World Bank. Anaa ang presensya nila Sir Zaldy Boron, ang regional technical director for operations sa opisina ni Regional Director Arlan Mangelen sa DA Region 12.

Joint project kini sa PRDP-World Bank (60%), Department of Agriculture (20%), Sarangani Provincial Government (20%), ug SAVESEGROW (equity) ilalum ni Manager Ramonito Secreto, diin nagtampo-tampo ang kada hut-ong aron mamugna ang proyekto gitawag nga "Consolidation, Trading and Marketing of Whole Coconuts." Ug tuod man, aduna kini kinatibuk-ang pondo nga muabot og Baynte Tres Milyones ka pesos (₱ 23M).

₱ 4.6 Milyon ka pesos ang kantidad sa brand new 10-wheeler delivery truck, ₱ 3.2 Milyon ka pesos ang balor sa brand new 6-wheeler hauling truck, samtang ang dul-an Onse Milyones ka pesos (<₱ 11M) ang gitagana para sa working capital, mga modernong kagamitan/pasilidad sama sa truck scale ug dehusker, ug sa ginahuman karon nga konstraksyon sa planta sa lubi.

Tibuok lubi ang ginapalit sa SAVESEGROW sa mga coconut farmer aron wala nay hasol. Gadawat usab sila og kopras sa mga duol sa ilang warehouse. Adunay exclusive buyer ang SAVESEGROW nga mas mahal ang palit kaysa sa presyo sa merkado.

Segun ni Sarangani Assistant Provincial Agriculturist Annabelle Tagaza, nalipay matud pa ang industriya sa lubi sa probinsya sa Sarangani tungod gitutukan sila sa liderato ni Governor Solon, sa pagpangamot sa mga kadagkuan ug personahe sa OPAG ug PPDO sa pamunuan nila Mr. Jonathan Duhaylungsod, Engr. Alain Alcala, apil na si Assistant Provincial Administrator Engr. Gerald Faciol. Gani, duha (2) ka planta sa virgin coconut oil sa managlahi nga minilyong pondo ang nakatakda nga paga-abrihan sa Sarangani.

Niaging bulan sa Pebrero, pormal na-turnover ang mga brand new hauling truck, delivery truck, mga hi-tech nga himan ug ang planta sa abaca nahimutang sa Barangay Maligang, Kiamba, Sarangani Province, sa pagdumala sa United Maligang (Abaca) Farmers Multi-purpose Cooperative. Proyekto gihapon sa PRDP nikantidad og hapit Trayntay Sais Milyones ka pesos (<₱ 36M).

Gitutukan usab ang produkto nga cacao. Gipondohan og kapin Onse Milyones ka pesos (₱ 11M>) ang maong cacao project. I-turnover napud kini sunod mga binulan, rason nga nagpasalamat og dako sa Kahitas-an si Governor Solon kauban sila Vice Governor Elmer De Peralta, tanang board member, mga mayores, lakip na sila Senador Manny ug Congressman Ruel Pacquiao.

(Source: Provincial Information Office – Sarangani, photo courtesy of DA XII)