Mihangyo si Davao City Mayor Sara Duterte-Carpio ngato sa mga Dabawenyos nga dili tagdon ang kisaw sa pulitika aron dili mawala sa pokus ilabi na sa pagsunod sa minimum public health standards. Kini taliwala sa nagkadool na nga filing of certificate of candidacy ug ang pagsugod sa kasikas sa hisgutanang politika.

Giawhag ni Mayor Sara ang tanang katawhan sa siyudad nga kinahanglan huna-hunaon kanunay nga ni-patigbabaw pa ang Community Quarantine Status ayha maglusad og mga aktibidad nga posible pa unya nga makasupak sa mga guidelines ubos sa IATF, DOLE, ug DTI bisan sa mga Executive Orders sa lokal nga panggamhanan sa dakbayan.

Gipamugos ni Mayor Sara nga likayan una ang paglusad og mga dagkong aktibidad nga dunay kalambigitan sa politika aron dili mahimong hinungdan sa pagsamot unya sa pagtakod sa virus.

Mahinumduman nga sunod-sunod nga caravan ang gipahigayon sa milabay nga mga adlaw aron awhagon si Mayor Sara nga modagan sa pagka-presidente sa 2022 election kung asa pinakaulahi niini mao ang caravan sa Ituloy ang Pagbabago Movement kon IPM nga nanukad sa Davao Occidental ug nahuman didto sa Nabunturan sa Davao de Oro.

(Source: Davao-City Information Office)