Maladingitan ni Punong barangay Jojie Jimenez iti Brgy. Poblacion, Burgos gapu ti kaadda iti kaso ti covid 19 iti barangay da.

Kunana a tumultulong da a barangay frontliners iti LGU- Municipal health office tapno malapdan ti ad adda pay a panagwaras ti virus.

Kunana a nupay adu pay laeng dagiti active cases da adu metten dagiti limmaing kadagiti immuna a nagpositive.

Inlawlawagna nga iti agdama, lockdown ti Sitio a nagtaudan iti virus ken naiget a mabanbantayan dagiti pagtaengan tapno awan ti rumuar.

Inpalgakna nga inikkan da met iti signage ti kada pagtaengan nga addaan iti nagpositibo nga awan ti maipalubos a bisita tapno maballaagan dagitoy.

Kunana a dagiti Barangay Health Worker (BHW) ken tanod ti mangidanon no ania man iti pagatang ken dadduma pay a serbisio nga ipaay da kadagiti nalockdown a pamilya.

Innayon ti Punong barangay iti Brgy. Poblacion, Burgos nga ar aramiden da daytoy kas panangproteher metten kadagiti kailianda manipud iti pannaka apektar iti covid 19.
(Cita Macalipis, RPN DZRL Batac Correspondent)

(Source: Provincial Government of Ilocos Norte)