"I was very happy and impressed with the support of the Local Chief Executive on the COVID Immunization Roll-Out, nasa leadership talaga yan", kini ang gipamahayag ni Maria Teresita G. Hilario, UNICEF (United Nations International Children's Emergency Fund) Consultant for Monitoring and Technical Assistance in Routine and COVID Immunization Roll Out, atol sa iyang pagbisita dinhi sa dakbayan sa Dipolog, kaganihang buntag, Agosto 16 ning tuiga.

Tumong ni Hilario sa iyang pag-anhi dinhi sa dakbayan mao ang pagsusi kon anaa ba ang gikinahanglang mga vaccines alang sa mga vaccinees, kon kompleto ba ang manpower alang sa pag-implementar sa vaccination program ug kon maayo ba ang pagdumala sa nasangpit nga programa.

Atol sa diyalogo nila ni Mayor Darel Dexter T. Uy ug UNICEF Consultant Hilario didto sa Zamboanga del Norte Convention and Exhibition Center (ZNCEC), diin kamulo usab ang pagpahigayon sa vaccination sa kategorya sa A4, miluwat sa konklusyon ang uwahi nga maayo ang pag-implementar sa vaccination program dinhi sa Dipolog apan kulang gayod ang suplay sa bakuna.

Kini usab ang gipadayag ni Mayor Uy nga sitwasyon ngadto ni Hilario, sumala niya ang dakbayan maoy "gateway" dinhi sa probinsiya sa Zamboanga del Norte busa gikinahanglan gayod ang dugang mga vaccines aron ma-protektahan ang katawhan sa pagkaylap sa COVID-19 Virus og niini mipasalig si Hilario nga dal-on niya sa Regional nga buhatan sa Department of Health ang hangyo ni Mayor Uy.

Gibutyag usab sa Mayor nga adunay lima ka mga vaccination sites ang Dipolog ug kini mao ang ZNCEC, Dipolog Medical Center (DMC), Drive Thru ug duha (2) ka mobile teams nga molibot sa mga lagyong kabaranggayan.  Dugang nasayran nga sulod sa usa ka adlaw, mokabat sa dili mo-menus sa 1,500 ang mabakunahan sa tibuok dakbayan.

Si UNICEF Consultant Hilario nasayrang magpabilin dinhi sa Dipolog sulod sa usa ka semana alang ning maong katuyoan samtang laing usa ka semana usab ang iyang igahin sa dakbayan sa Dapitan.

(Source: CITY INFORMATION OFFICE  |DIPOLOG CITY GOVERNMENT Facebook page)