Karong adlawa atong ginasaulog ang ika-158 nga anibersaryo sa pagkahimugso sa rebolusyonaryong bayaning Pilipino nga si Andres Bonifacio, nangulo sa masang dinaugdaug ug pinahimuslan sa paglunsad og armadong pagsukol aron palayason ang kolonyalistang Espanyol. Gipasiugdahan ni Bonifacio ang pangandoy sa hut-ong mamumuo, mag-uuma ug uban pang demokratikong hut-ong. Natuhup kaniya ang progresibong burges nga demokratikong diwa sa rebolusyong Pranses nga nangayo og "kagawasan, panag-angay, panag-igsoonay."
Ato usab nga ginasaulog karong adlawa ang ika-57 nga anibersaryo sa Kabataang Makabayan (KM), ang organisasyong masa sa patriyotikong kabatan-onan, ang pinakalig-on nga alyadong organisasyon sa National Democratic Front of the Philippines (NDFP). Sa tibuok kasaysayan niini, nagsilbi ang KM isip kasaligang katimbayayong sa PKP sa pagpukaw, pag-organisa ug pagpalihok sa mga kabatan-onan ug nagsilbing lalum nga atabay sa pagbansay ug pagrekrut sa mga komunistang kadre. Atong pasidunggan ang liboan ka patriyotikong kabatan-onan ug komunista gikan sa han-ay sa KM nga nahimong kumander ug manggugubat sa Bagong Hukbong Bayan (BHB), ingonman ang mga yaweng kadre sa Partido nga nangulo sa mga pangmasang pakigbisog ug uban pang importanteng tahas sa paglunsad sa demokratikong rebolusyon sa katawhan.
Kinahanglang hinumduman sa mga kabatan-onang Pilipino ang kinabuhi ug sakripisyo ni Andres Bonifacio ug sundon ang iyang walay kinutuban nga gugma sa yutang natawhan. Kinahanglang madasig sila sa iyang kaisog ug sila mismo adunay kaisog sa pagpakigbisog alang sa kagawasan ug sa tanan nga makatarunganon.
Ang pagdumdum kang Bonifacio ug pagbaton sa iyang kinabuhi sa pagsukol nagpabiling mahinungdanon samtang ang nasud nagpabiling anaa sa semikolonyal nga kontrol sa US nga giharian sa mga bag-ong ilustrado ug mga traydor sa nasud. Sama nga nakig-away si Bonifacio sa mga nagluib sa kawsa sa katawhang Pilipino alang sa kagawasan, kinahanglan usab sa kasamtangang henerasyon sa mga batan-ong Pilipino nga batukan ang mga miyukbo sa interes sa mga multinasyunal nga korporasyon ug mga bangko ug langyaw nga imperyalistang gahum ug sa ilang mga militar.
Labaw usab nga mahinungdanon alang sa mga Pilipino, ilabina sa mga kabatan-onan, nga mokutlo og inspirasyon gikan sa panumduman ni Bonifacio samtang nakigbisog sila aron tapuson ang korap, madaugdaugon ug bangis nga pagpanumpo sa mga Duterte ug uban pang mga dagway sa pasismo. Ang dakung mayorya sa katawhan napailalum sa terorismo ug kabangis sa estado sa usa ka pakyas nga pagsulayng pakyason ang ilang singgit alang sa yuta, trabaho ug katilingbanong hustisya.
Sama sa gipakita sa kinabuhi sa pagsukol ni Bonifacio, ang pakigbisog alang sa kagawasan ug demokrasya puno sa mga sakripisyo ug kalisdanan. Sa kasamtangan, kadtong nakig-away alang sa kawsa sa nasudnong kagawasan ug katilingbanong hustisya nag-atubang sa susamang mga peligro sa kinabuhi ug kagawasan. Kinahanglang mokuha sila og kusog gikan sa katawhan ug madasig sa kabayanihan ni Andres Bonifacio ug sa mga henerasyon sa mga bayani ug martir nga mihatag sa ilang tibuok kinabuhi sa pag-alagad sa katawhan.
WordPress.com
No comments:
Post a Comment