Gideklara sa Partido Komunista ng Pilipinas (PKP) ang Nobyembre 7, 2021 isip Pangkalibutang Adlaw sa Paghandum alang kang Ka Oris (Kaubang Jorge Madlos), kanhing kumander ug tigpamaba sa Bagong Hukbong Bayan (BHB) ug bayani sa katawhang Pilipino.
Gipahimangno sa PKP sa tanang yunit sa Bagong Hukbong Bayan nga magpormasyon ug itanghal ang mga armas sa udtong tutok, ipataas ang mga bandera sa Partido ug BHB ug maghatag sa hugot nga pagsaludo, isip paghatag pasidungog sa lima ka dekada nga pag-alagad ni Ka Oris sa katawhang Pilipino ug sa demokratikong rebolusyon sa katawhan.
Mamahimo usab nga magpahigayon sa mga tago nga memorial meeting ug asembliya ang mga komite sa partido ug mga rebolusyonaryong organisasyong masa kung asa pwede nilang basahon ang mensahe sa Komite Sentral para kang Ka Oris ug magdalit og mga diskurso ug mga kanta.
Sa maong adlawa, giawhag sa Partido ang tanang Pulang manggugubat ug kadre sa Partido nga pakusgon ang ilang determinasyon nga suklan ang paghari sa terorismo sa kaaway batok sa katawhan, ug makigbisog aron makab-ot ang hustisya para kang Ka Oris ug sa tanang bayani ug martir kansang brutal nga gipamatay sa mga pasista ug teroristang estado. Ang ilang kinatas-ang sakripisyo alang sa tanang dinaugdaug ug pinahimuslan nga mga hut-ong dili makawang.
Angayang dumdumon si Ka Oris karong Nobyembre 7. Niining adlawa, kapin usa ka gatos ka tuig ang na milabay dihang gipukan sa proletaryado nga gipangulohan sa mga Bolshevik ang burgesya sa Russia ug nag-abli sa bag-ong panahon sa tawhanong pag-uswag ubos sa sosyalismo.
Gani, si Ka Oris usa ka Pilipinong Bolshevik nga nagserbisyo sa interes sa hut-ong mamumuong Pilipino ug mihatag sa tibuok niyang kinabuhi sa kawsa sa internasyonal nga proletaryado. Taas ang iyang pagsalig nga ang mga proletaryong rebolusyonaryo sa tibuok kalibutan makabaton og kusog ug mobanwag sa dalan alang sa usa ka bag-ong kalibutanong pagsulbong sa mga anti-imperyalista ug sosyalistang pakigbisog.
WordPress.com
No comments:
Post a Comment