Sa katapusang adlaw sa bulan sa Nobyembre karong tuiga mao ang ika-158 ka katuigan gikan gipanganak ang bantugang bayani nga si Andres Bonifacio. Isip paghinumdum kay Bonifacio, angayan lang nga atong balik lantawon ang iyang kinabuhi ug pakigbisog aron kita makat-on sa kasaysayan ug sa diwa nga iyang gipakita sa katawhang Pilipino.
Si Bonifacio ug iyang lima ka mga igsoon sayo nawad-an og ginikanan. Tungod sa maong panghitabo, napugos siya sa batang edad isip kinamaguwangan nga mangita og panginabuhian. Naggama sila og mga igbabaligyang sungkod, papel nga paypay, ug mga poster aron isustento sa ilang panginahanglan.
Tungod dili prebilihiyado ang ilang pamilya, wala kahuman sa pormal nga edukasyon si Bonifacio. Naningkamot lamang siya sa kaugalingon nga magtuon ug magbasa og mga libro. Tungod sa mga librong iyang nabasa hilabina ang mahitungod sa rebolusyon sa nasud Pransya, dako kini og impluwensya kaniya aron mahigmata ug madasig batok sa kolonyalismong Espanya.
Tungod wala silay kabtangan sa produksyon, napugos si Bonifacio nga ibaligya ang iyang kusog pamuo. Nahimo siyang ahente, broker, ug bodegero sa lain-laing kompaya. Isip mamumuo, dinhi nasinati ni Bonifacio ang kapitalistang pagpahimulos ug pagpanduag-daug. Sa pikas bahin, dinhi sab niya nasinati ang kamahingundanon sa panaghiusa sa mga mamumuo, pag-organisa, ug ang panginahanglan sa pagpalagpot sa madaug-daugong Espanya.
Nahimong bantugang lider sa Katipunan ug sa rebolusyong Pilipino si Bonifacio. Gibarogan niya ang pannginahanglanon sa nasudnong kagawsan batok sa kolonyalismo ug pagtukod og kaugalingong gobyernong Pilipino.
Si Bonifacio gitraydor ug gipatay sa grupo nila Emilio Aguinaldo tungod nakigkonsabo ang naulahi ngadto sa Imperaylistang Estados Unidos pinaagi sa subornong salapi. Nagmalampuson si Aguinaldo ug iyang mga kahut-ong nga mga dagkong agalong yutaan ug mga kapitalista sa ilang dautang laraw sa nasud.
Gikan kay Aguinaldo ug sa mga misunod niyang presidente sa nasud hantud karon sa panahon ni Duterte, ang mga nahimong lideres sa nasud mga representante sa dagkung agalong yutaan, dagkung burgesyang komprador, ug itoy sa imperaylistang mga nasud susama sa Estados Unidos.
Ang pagka-itoy ni Duterte sa imperyalismong Estados Unidos ug Tsina mahulagway sa iyang mga programa ug polisiya. Sa hisgutanang ekonomiya, padayon ang pagpatuman sa mga neoliberal nga prinsipyo sa kapitalismo. Giluagan ang mga balaod aron pasudlon ang mga langyawng kapitalista susama sa pagtugot sa pagkawkaw sa mga bahandi sa nasud sa pagmina sa mga langyaw, planong pagtugot sa hingpit nga pagpanag-iya sa mga langyaw sa atong yuta, telekomunikasyon, transportasyon, eduasyon, ug ospital.
Ang pagpadayon sa kontraktwalisasyon ug ang pagpugong sa usbaw sa suholan mialagad ngadto sa interes sa mga kapitalista.
Gipatuman ni Duterte ang TRAIN Law nga miresulta sa pagsaka sa presyo sa mga palaliton subay sa dikta sa imperyalistang US aron ang makolektang buwis ibayad ngadto sa atong utang kanila.
Ang programang Build, Build, Build ni Duterte mipaburot sa utang nasud. Ang mga proyekto sa Build, Build, Build, wala makatabang sa pagpalambo sa panginabuhian sa masang Pilipino. Ang nabulahan sa maong proyekto kay si Duterte ug iyang mga pinaboran nga mga kontraktor susama nila Bong Go, Villar, ug mga Uy sa Davao de Oro ug Davao del Norte.
Sa pagkuyanap sa Covid sa nasud, samot nga miulbo ang utang sa nasud nga mokabat na sa P11.92 trilyon sa bulan sa Setyembre. Gikurakot ni Duterte ug iyang mga alipores ang kwarta sa nasud nga para sa pag-atubang sa pandemya. Nabutyag ang P15 bilyon korapsyon sa Philhealth, P67 bilyon sa Department of Health, P10.40 bilyon nga korapsyon sa ayuda sa DSWD, sa syudad sa Dabaw ang 600,000 ka relief packs nangawala ug wala mahatag sa katawahan. Ang P28 bilon nga badyet sa NTF-ELCAC nahimong gatsan sa mga heneral ni Duterte og mga lokal nga politiko.
Gigamit ang ang NTF-ELCAC aron dauton, hasion, ug patyon ang mga aktibista nga ligal nga nakigbisog. Ang mga masa pugos nga ginapasurender isip mga membro sa NPA o supporter aron kawkawon ang badyet sa NTF-ELCAC.
Ang kawalay bug-at nga industriya sa nasud ug epekto sa pandemya mitala og 4.25 nga walay trabaho ug 45% sa pamilyang Piliino ang giilang kabus subay sa kaugalingong datos sa reaksyunaryong gobyerno.
Gawas sa ekonomikanhong pagpalisod, gisamotan pa ni Duterte ang pagpandaug-daug pinaagi sa pagpatuman sa Martial Law, War on Drugs, ug Gyera ngadto sa Reboluyonaryong Pwersa apan lakip ang mga aktibista ug tigpanalipod sa tawhanong katungod.
Sa kaberdugo ni Duterte mipatay na kini og 421 ka mga aktibista, 572,752 kasong pagpanghasi, kapin milyon nga biktima sa pagpamomba sa kabukiran ug sa Marawi. Sa "Gyera batok sa Droga", mikutlo kini og kapin 20,000 ka kinabuhi.
Gilabwan ni Duterte ang tanang presidenet nga mingagi sa nasud sa hisgtunang korapsyon ug kaberdugo. Anaa sa grabeng kaaloat ang kahimtang natong mga mamumuo ug katawhan sa kasamtangan, ug peligrong maalaot pa kini kung padayon mahuptan ni Duterte ug iyang kaalyado ang gahum politika sa nasud.
Isip mga mamumuo, kinahanglan ang panaghiusa nato aron panalipdan ug iduso ang atong interes. Sa pinakabatakan, mahinungdanon ang pagnahiusa sa ang-ang sa empresa pinaagi sa unyon o asosayon. Pinaagi niana atong maduso ug makauha ngadto sa kapitalista og mga ginagmayng konswelo aron patas-an ang atong suholan ug madungagan ang benepisyo.
Apan sa pikas bahin, dili kana paigo kung atong ihigot ang tong kalihukan nganha sa pakighangyoay lang ngadto sa kapitalista. Apetado kita sa mga pagtaas sa presyo sa palaliton, pamashe, edukasyon, kuryente, tubig, ug uban pa. Ang maong pagsaka sa presyo resulta lamang sa usa ka sistema sa ekonomiya nga nagatunhay kung diin gapabor sa mga kapitalista ug agalong yutaan. Anaa ang panginahanlgan nga ang kasamtangang sistema atong usabon.
Apan tungod dili simpleng mosugot si Duterte ug ang mga nagharing hut-ong nga usbon ang kasamtangang sistema, maong kinahanglan sab ang armadong pagsukol natong mga mamumuo ug masang Pilipino. Pinaagi lamang sa demoratikong rebolusyon sa katawhan nga gigiyahan sa Partido Komunista sa Pilipinas, paglumpag sa reaksyunaryong estado ug pagpuli sa demokatikong gobyerno sa katawahan, ug pagpundar sa Sosyalismo tiunay nga makab-ot ang kabag-ohan ug paglambo sa atong panginabuhian.
Anaa ang dakong hagit kanatong mamumuo nga gampanan ang atong makasaysayanong papel sa kalibutan nga pamunuan ang rebolusyon ug lumpagon ang kapitalismo. Salmot kita sa reoblusyonaryong pakigbisog aron tapuson ang gisugdan nga pakigbisog ni Andres Bonifacio.#
WordPress.com
No comments:
Post a Comment