Simula noong lumabas sa Bahay ni Kuya, malayo na ang narating ng dating Pinoy Big Brother housemate na si Seth Fedelin bilang isang aktor at endorser, ngunit hanggang ngayon ay hindi pa rin niya iniiwan ang dati nilang bahay, kahit pa malaki na ang kanyang kinikita.
Sa recent YouTube vlog ng beteranong broadcaster at talent manager na si Ogie Diaz, ibinahagi ni Seth ang kanyang istorya, kabilang na ang dahilan kung bakit hanggang ngayon ay naroon pa rin siya sa bahay nila sa Cavite.
"Home is family, happiness, and everything. Lahat nando'n. 'Yong bahay namin, do'n ako pinanganak. 'Yong kwarto ko ngayon, do'n ako pinanganak. As in 'yong bahay na 'yon napakaano sa akin. Wala pa ako, bahay na," aniya tungkol sa dahilan kung bakit mahal na mahal niya ang nasabing tirahan.
Nasubukan na rin daw ni Seth na tumira mas malapit sa trabaho at dalawang beses sa isang buwan na lang umuwi ng Cavite, pero hindi rin nagtagal at naramdaman daw nito ang pangangailangan niya na umuwi.
"Kasi no'ng nagsisimula po ako, tumira ako ng Don Antonio, [Quezon City], sa may Ever. And umuuwi lang ako sa bahay sa Cavite parang two times a month," pagbabahagi niya. "So, parang hindi ko nakumusta sila Mama. Hindi ko sila masyado nakakausap. And September ng 2019, tumawag si Ermat. Sabi niya, 'Anak uwi ka dito. 'Yong lolo mo mukhang mamaalam na.'"
"Umuwi ako no'n. Takbo ako ng Dasma no'n. 'Yon narealize ko na parang ito na lang ba 'yong gagawin ko? 'Pag merong ganiyan at saka ako pupunta? At saka ako makakaalalang pumunta?" aniya.
Dito ay nagdesisyon siyang bitiwan ang kanyang condo at bumalik sa kanila. Sa pagbabalik, unti-unti niya rin ipinaayos ang bahay na puno ng mga alaala nila ng pamilya. Mas magiging masaya raw siya kung hindi lang siya ang nakararanas ng ginhawa.
"'Yong bahay namin tatlong kuwarto lang. 'Yong normal na bahay sa subdivision, which is dati, tingnan mo, Tito, sa condo ako nakatira. Sala ko may aircon, may heater 'yong banyo ko, 'yong dalawang kuwarto ko sa condo, may aircon, may TV na maayos, ang ganda," aniya. "Pero 'yong bahay ko ito lang. Naka-vinyl lang. Walang aircon, ang init. 'Yong CR, hindi maayos. Do'n ko na-realize na, 'Ano 'to?' Hindi tama 'to.'"
Panoorin ang video na ibinahagi ni Ogie Diaz sa YouTube:
No comments:
Post a Comment