Simple lamang ang masarap na meryenda para sa mga batang Pinoy noon. Margarine at asukal lang, sasarap na ang ordinaryong tinapay at magiging satisfied na sila. Isa ka ba sa mga nahilig sa ganito noong ikaw ay musmos pa?
Sa litratong ini-upload ni Marlo Ren Celemente sa Facebook group ng page na Klasik Titos and Titas of Manila, binalikan ng marami ang isa sa mga paborito nilang meryenda noong sila ay mga paslit pa.
"Ginawa mo ito noong bata ka at hanggang ngayon ginagawa mo pa rin bago dumating ang araw ng suweldo," saad ni Clemente sa caption ng larawang ibinahagi niya.
"90s thing! Samahan mo pa ng Star rice," wika naman ng admin sa na nagbahagi ng screenshot mula sa grupo.
Hindi na nakagugulat na marami ang naka-relate sa post na ito at nagsimulang magbahagi ng kani-kanilang karanasan ang mga social media user sa pamamagitan ng comments section at sa caption ng kanya-kanya nilang shared post.
May mga naging paborito raw ito na halos ito na lamang ang kinakain sa almusal at meryenda. Mayroon namang ipinapares ito sa softdrinks. May mga nagsabi rin na mas nakahiligan nila ito kaysa sa sweet blend flavor ng isang margarine brand. Mayroon ding ipinapa-toast ito para mas maging masarap pa para sa kanila.
Samantala, bukod sa masarap na lasa nito, marami rin daw ang hindi makalimutang naniwala sila na tatangkad kapag pagpatuloy sila sa pagkain ng tinapay na nilagyan ng margarine.
"Pinangakuan akong tatangkad kapag kumain ako nito. Awa ng Diyos, tumangkad mga kapatid ko," kuwento naman ng social media user na si K. Valera.
"Breakfast at lunch," kumento naman ng user na si M. E. Misa. "Sabi kasi tatangkad daw ako. Hindi naman nangyari."
Tumangkad man o hindi, isa lamang ang tama: matatamis na alaala ang dala ng tinapay na may margarine at asukal.
No comments:
Post a Comment