Isa sa mga pangalang nagbigay ng karangalan sa Pilipinas ay si Lea Salonga. Kinilala ang husay niya sa pag-awit at pag-arte sa teatro at nakatanggap ng iba't ibang parangal kabilang ang prestihiyosong Tony Awards Best Actress in a Musical noong 1991.
Sa kabila ng kasikatan ng singer, inilahad niya sa isang panayam na kahit kilala siya sa buong mundo ay mas pinili niyang magkaroon ng kaunting kaibigan ngunit mga totoo naman at tunay na nariyan anuman ang pinagdaraanan niya.
Lahad ng The Voice Philippines coach, nang mag-mature daw siya ay napagtanto niya kung paano salain ang maraming bagay sa kanyang buhay, kabilang ang mga kaibigang totoo sa hindi. Dahil dito, hindi na raw namalayan ng Broadway actress na mayroon na siyang mas kaunti ngunit mas totoong mga kaibigan at masaya naman siya sa piling ng mga ito.
"This (when she got married) is when you start getting rid of any and all things that you might see as not authentic or hampering your journey towards honesty and authenticity… And I am finding I have fewer friends now. They are fewer, but they're truer, and I'm so perfectly happy with that," saad ni Lea sa nasabing interview.
Dagdag pa ng dating lead actress ng Miss Saigon, nang makilala niya ang asawang si Robert Chien, isang Chinese-Japanese businessman, at magkaroon ng anak na si Nicole, naimpluwensiyahan raw siya ng mga ito na mas maging totoo pa sa kanyang sarili dahil kilala raw siya ng kabiyak at ng kanyang anak kung nagiging matapat siya o hindi.
Kilala si Lea bilang prangka at madalas na maglabas ng kanyang opinion sa mahahalagang usapin. Katunayan, ngayon ay aktibo rin ang singer-actress sa kanyang social media account. Gayunman, kahit na isang tinitingalang bituin si Lea ay kilala rin ito sa pagiging pribado sa kanyang personal na buhay at madalas lamang mapag-usapan dahil sa mga ginagawa nitong proyekto.
Huling napanood ang International Broadway Icon na si Lea sa trending singing show na The Voice Philippines kung saan nagsilbi siyang coach sa lahat ng edisyon nito.
Ngayon, abala si Lea sa paggawa ng proyekto abroad, kabilang ang American series na Pretty Little Liars: Original Sin kung saan gumaganap siyang nanay ng isa sa mga bida.
No comments:
Post a Comment