Puffed rice, pop rice, ampaw—o kahit ano pang tawag, hindi maikakaila kung gaano nakahiligan ng maraming Pilipino noon ang kumain ng isang kakaibang luto sa kanin.
Isa ang puffed rice sa mga pagkaing naging patok noon sa mga Pinoy; bata man o matanda ay tumangkilik nito. Sulit na sulit dahil mura na, masarap pa ang pagkaing ito na nakalagay sa maliit na pahabang supot na katulad ng sa ice candy at mabibili ito sa tindahan sa halagang piso lamang.
Sa Facebook page na Batang Pinoy-Ngayon at Noon, ibinahagi ng isa sa mga admin ang litrato nito. Tanong niya, "Bumibili rin po ba kayo nito noon?"
Naka-relate naman kaagad ang maraming social media users at nagbalik-tanaw sa mga alaalang kakabit ng isa sa mga paborito nilang pagkain noon na sabi nila ay talaga namang masarap at kayang-kaya nilang bilhin mula sa kanilang baon.
"Paborito ko 'to, nakaka-miss! Sarap balik-balikan ang mga panahong nagdaan. Simpleng buhay pero masaya," kumento ng Facebook user na si C. Rita.
"Ampaw sa amin. May bilog at rectangle ang shape. Kasamahan 'yan ng hopia at chicharon na ibinebenta sa terminal ng bus," sabi ni D. G. Arellano.
"Favorite namin 'yan! Pasalubong ng lola kapag namalengke sa bayan. Pag-uwi ng bukid, agawan sa bayong ng lola ang mga apo," pagbabalik-tanaw ni M. B. Gatmaitan.
"Pasalubong ng tatay ko laging ganiyan 'pag bumaba siya sa Bayan. Sarap niyaan, matamis at medyo malutong," sabi ni M. S. Ampay.
Samantala, kung nahilig ka rin dito noon at nalulungkot na hindi ka na makabili sa tindahan, alam mo ba na puwedeng-puwede ka gumawa sa sarili mong bahay? Sa isang video na ini-upload ng Flavor Lab, itinuro sa mga social media user kung paano gumawa ng puffed rice.
Ano ang mga hindi mo makalilimutan sa puffed rice? Ibahagi sa amin ang iyong kuwento!
No comments:
Post a Comment