Biro ng maraming matatanda ngayon, kung alam lang daw nilang magiging mailap ang tulog ngayong may edad na sila, sana raw ay sinulit na nila ito noong bata pa.
Hindi na kasi bago sa maraming musmos noon ang takasan ang oras ng siesta o pagtulog sa tanghali o hapon. Mas gusto ng maraming bata noon na maglaro kaysa magpahinga sa hapon. Dahil dito, napipilitan ang mga magulang at nakatatanda na ilabas ang isang mabisang 'instrumento' para 'makumbinsi' ang mga batang matulog: ang mahiwagang stick.
Nagbalik-tanaw ang maraming batang 60s-2000s sa madalas na eksena sa siesta. Sa Facebook page na Lahat 1900s, makikita sa larawan ang isang lola na may hawak na stick katabi ang mga apo niyang natutulog.
Wala mang masyadong paliwanag ang post, gets na agad ng mga netizen ang mensahe nito dahil halos lahat yata ay naranasan ito. Kapag inilabas na nina lola, lolo, nanay, at tatay ang kanilang mahiwagang stick, wala nang choice ang mga bata kung hindi mahiga at mag-siesta.
Ang nasabing larawan ay ibinahagi rin ng Facebook page na Note. kung saan maraming netizen ang masayang nagbahagi ng kanilang alaala sa mahiwagang stick at pahirapang pagpapatulog noon sa hapon.
Kung may common word man sa comment sections ng mga post, ito ay ang salitang "relate."
Ayon sa ilang social media users, noon daw ay itinuturing nilang parusa ang pagpapatulog sa kanila sa hapon. Gayunman, ngayong matanda na sila ay napagtanto nila ang kahalagahan nito. Ngayong sila ay may sarili nang pamilya, nais din nilang makasanayan ng mga anak nila ang pagtulog sa hapon.
Pagmamalaki naman ng ilan, ang eksenang ito ay pagpapakita kung paano disiplinahin ng mga nakatatanda ang mga bata noon. Maigi raw na naibabahagi ito sa social media ngayon nang sa gayon ay maipakilala sa makabagong henerasyon.
Para naman sa ilang magulang, nananatili ang ganitong klase ng pagdidisiplina sa mga bata. Kahit naman daw makabago na ang panahon, maaari pa rin itong gawin dahil napakahalaga sa kalusugan ng mga bata ang sapat na oras ng pagtulog.
Ikaw, ano ang naaalala mo kapag nakikita mo ang mahiwagang stick ng iyong lola o nanay kapag oras ng siesta?
No comments:
Post a Comment