Kamakailan lamang ay naging mainit na usapin sa social media at mundo ng showbiz ang mga artistang "uma-attitude" o "late" na dumarating sa taping o shooting, ayon na rin sa testimonya ng mga kapwa celebrity o senior artist, kagaya na lamang ng rebelasyon ng batikang aktres na si Dina Bonnevie.
Dahil dito, usap-usapan ang video ng panayam kay Comedy Queen Ai Ai Delas Alas ng ilang mga miyembro ng entertainment press, matapos niyang ibunyag ang pagiging late ng isang dating produkto ng talent-search na "Starstruck" ng GMA Network.
Ayon sa ulat ng Balita Online, naloka raw si Ai Ai at ang direktor ng pelikulang kanilang ginagawa dahil super late daw dumating sa set ang naturang Starstruck alumnus.
Alas-otso ng umaga raw ang call time nito subalit alas-tres na ng hapon dumating at pawala na ang araw!
Inalala ni Ai Ai ang pangalan nito, na inilarawan pa bilang "Mr. Smiley" at ang talento raw ay ang smile o ngiti niya.
"Si Rainier!" bulalas ng Comedy Queen.
Ang tinutukoy niyang Rainier ay walang iba kundi si Rainier Castillo, na nagmula sa Batch 1, kasama nina Jennylyn Mercado, Mark Herras, Yasmien Kurdi, Nadine Samonte, Katrina Halili, Dion Ignacio, Cristine Reyes, at iba pa.
Ikinuwento pa ni Ai Ai na parang dedma lamang daw ito nang masita, dahil kasagsagan ito ng kaniyang kasikatan. Matatandaang patok na patok ang Starstruck Season 1 noon, at hanggang ngayon naman ay sikat na sikat pa rin ang mga naging produkto ng Season 1 nito.
Dagdag pa ni Ai Ai, siya mismo ang nakasaksi kung paano "magsampalan" ang mga babae sa labis na kilig, masilayan lamang si Rainier. Talaga raw nagtitilian ang fans kapag lumalabas na si Rainier sa entablado, sa tuwing may mall show sila upang i-promote ang kanilang pelikula.
Ang pelikulang tinutukoy na pinagsamahan nila ni Rainier ay "Shake, Rattle, and Roll 2K5".
Sa ngayon ay hindi na aktibo sa showbiz si Rainier.
Wala pa itong tugon, reaksiyon, o pahayag hinggil sa naging rebelasyon ni Ai Ai. Ang naturang video ni Ai Ai ay ibinahagi sa Facebook post ng showbiz insider na si "Nherz Jane".
No comments:
Post a Comment