Naging masaya ngunit napuno rin ng kaba sa kalaunan ang first date ng aktor na si Jak Roberto at ng kanyang kasintahan na ngayon na si Barbie Forteza.
Sa Updated With Nelson Canlas, ibinahagi ng magkasintahan na magkasama sila ng isang buong araw para sa kanilang first date at nanood ng tatlong pelikula, kasama ang isang last full show sa isang 4D na sinehan. Dahil 4D ang sinehan, gumagalaw-galaw ang mga upuan kaya aksidenteng nahulog ang wallet ng Kapuso actor.
"After ng movie, sa parking na kami, hinanap ko 'yong ticket ng parking kasi babayaran sa may labas. Hinanap ko 'yung wallet ko, wala, nalaglag," pagbabahagi ni Jak na pinipilit daw noon na kumalma kahit na may tsansang mauwi sa disaster ang kanilang first date ni Barbie.
"Calm down lang ako, ayokong magpakita ng [kaba]. 'Hindi okay lang 'yan, makikita rin 'yan. Bukas na lang siguro,'" pagpapatuloy ni Jak sa kanyang kuwento.
Gayunman, hindi pa rin daw maiwasan ni Jak na mataranta dahil nag-drive siya noon na walang lisensya at kung mahuhuli sila, tiyak na hindi magiging maganda ang impression ng kanyang date.
"Pero sa isip-isip ko, magda-drive ako walang lisensya. Paano kung kasama ko si Barbie tapos mahuli kami? Nando'n na 'yung panic ko. Tapos wala akong lisensya, nakakahiya naman first date napa-trouble kaagad si madam," aniya.
Mabuti na lamang at mabilis din nakaisip ng gagawin ang aktor, "Napakiusapan ko na lang na nalaglag 'yung ticket sa mall. Tapos nakilala naman kami, so binayaran ko pa rin naman 'yong penalty doon sa ticket 'pag nawala."
Samantala, nakabalik din naman daw kinabukasan ang wallet kay Jak. Ayon sa management ng mall, nakita ito sa 4D na sinehan kung saan sila naupo.
"Kaya doon sa mga magfi-first date, huwag 4D," pabirong sabi ni Barbie kaugnay ng first date nila ng kasintahan niya sa loob ng limang taon.
No comments:
Post a Comment