Sa anumang okasyon o selebrasyon, madalas na inaasam-asam natin na sana ay may nakahaing lechon na patatakamin ka sa lutong ng balat at linamnam ng laman na sasamahan pa ng sarsa na napakasarap gaya ng Mang Tomas.
Ngunit ilang araw matapos ang masayang pagdiriwang ng Bagong Taon, naging agaw-pansin ang post ng isang netizen kaugnay sa lechon na kanilang inorder na diumano'y nagpa-bad trip sa kanila.
Sino ba naman ang hindi sasama ang loob kung ang nakatatakam sanang order na inaasahan mo ay hilaw pa pala, duguan at may lamang-loob pa? OMG talaga ang masasambit mo siguro.
Litsong naletse?
Na-shock ang isang netizen at pamilya nito nang matanggap ang lechon na in-order nila at binayaran sa halagang P13,500. Ang nakagigimbal kasi ay halos duguan pa umano ang loob nito at malabong makain ang laman dahil hindi ito nailuto nang husto at maayos. Sa madaling salita, hilaw pa talaga.
Nanlulumong kuwento ni Michelle Halasan:, may nag-alok daw sa kanya doon sa kanilang lugar. Aniya, "nasa 60 kilos daw. 12k tapos +1500 sa magle-lechon daw."
Pumayag umano ang ginang dahil bukod sa malapit lang sa kanila, nagdadala daw 'yung nag-alok ng mga baboy na katay na para pang-ulam. Dagdag pa nito, regular customer na sila ng kanyang kausap.
Nang dinala na ang kanilang order na lechon, nagimbal umano sila matapos ilagay sa kanilang mesa ang lechon at umagos ang dugo noong hinila na ang tubong ginamit sa paglilitson nito.
Pagbabahagi ni Michelle, noong hiniwa ang lechon, hilaw na hilaw pa talaga ito. "Tapos nung hinati 'yung upper part mula leeg at ulo ay may naiwan pa doon na laman-loob na hilaw," paglalarawan niya.
Napatanong tuloy siya, "Okay lang kaya na bawiin ko 'yung 1500 para dun sa hiningi nila na para daw sa maglelechon?"
Nakapanghihinayang na itapon at hayaang masira. Kinabukasan ay pinaasikaso niya sa kanyang asawa ang muling pagluluto nito. Sila na lang ang nag-litson at umabot daw ng anim na oras bago naluto nang husto at natusta ang balat. Ang tinding aberya at abala ang nangyari.
Nakapanlulumo talaga kaya't sabi ng ginang, "Di ako talaga maka-move on. First time ko magpa-lechon tapos ganito nangyari."
Bumuhos ang napakaraming komento at reaksyon sa iba't ibang FB pages na nagbahagi ng post ng ginang.
Nabudol daw ang ginang, pinagpraktisan ang kaniyang order, minadali ang pagluluto at iba pa na idinaan na lamang sa 'jokes' ang pagpuna.
May mga nagpayo na sana ay ibinalik nila ito at nagpa-refund na lamang. May mga nagbiro rin na mahaba-habang kainan ng lechon paksiw ang kauuwian nito.
May mga naglabas din ng sama ng loob na mabuti pa raw sila at may natanggap na lechon kahit hilaw pa. Sila daw kasi ay na-scam pagkat walang order na dumating - hilaw man o luto - bagamat bayad na.
Samantala, mayroon din palang iba pa na hilaw rin ang natanggap na lechon nitong nagdaang Disyembre 2022 at hindi pa kaaya-aya ang itsura. Binansagan pa ito ng netizens ng 'HOPKOK" (half-cooked).
No comments:
Post a Comment