Isa ka ba sa mga natutuwa noon sa iba't ibang klaseng biscuits na laman ng Happy Time? May paborito ka rin bang kuhanin sa mga laman ng timbang ito?
Sino nga ba ang makalilimot sa Happy Time, ang klasik na pasalubong ng mga umuuwi noon sa probinsya? Bata man o matanda ay may kanya-kanyang paborito mula sa mga klase ng biskwit na kabilang sa pagpipilian mo kapag bumili ka nito.
Sa post ng Facebook page na Batang Pinoy-Ngayon at Noon, inalala ng mga social media user ang mga biskwit na kabilang sa sa classic biscuit mix na ito na tinatawag ding "pambansang pasalubong ng mga galing Maynila". May kanya-kanyang mga paborito at may listahan din ng mga hindi gaanong gusto ang mga nag-iiwan ng kumento.
"Sikat ka na sa probinsya noon kapag may pasalubong ka na ganito, ta's pila-pila magpipinsan kapag bigayan na. Ang saya pa noon kasi ginagawang games," pagbabalik-tanaw ng Facebook user na si A. Lovelace.
"Sa amin, kapag bumibili kami ng ganito, palaging 'yong Fita at Marie 'yong natitira. Tapos 'yong wafer at Hi-Ro ang nauunang maubos," ani J. F. Bandibas.
"Laging pasalubong 'to ng lolo namin. Mag-uunahan kaming magkakapatid or magpipinsan sa chocolate ta's 'pag naubos na, wapakels (walang pakialam) na," sabi naman ni JM Gatus.
Samantala, naalala naman ng iba na ang lalagyan ng biscuit mix na ito ay madalas gawing sisidlan ng kung ano-ano para mapakinabangan pa ito pagkatapos maubos ang laman. Ayon sa isa sa mga admin ng page, nilalagyan nila ng bigas noon ang timba nito kapag naubos na ang laman. Marami ang naka-relate at ang isa ay nagpakita pa ng litrato bilang patunay na hanggang ngayon ay "bigasan" pa rin nila ito.
Ikaw, ano ang paborito mo sa mga biskwit na nasa loob nito? May mga alaala bang bumalik sa iyo nang mabasa mo ito? Ibahagi ang iyong kuwento!
No comments:
Post a Comment