Masayang-masaya ang komedyanteng si Jervi Li o mas kilala bilang "KaladKaren Davila" matapos niyang ibahagi ang contract signing sa TV5 bilang pinakabagong news anchor sa flagship newscast ng TV network, ang "Frontline Pilipinas."
Kasama ni KaladKaren sina News 5 Chief Ma'am Luchi Cruz-Valdes at TV5 President and CEO Guido Zaballero nang i-done deal na ang kaniyang pagiging news anchor sa naturang programa.
"Mas inklusibo na po ang pagbabalita," pahayag ni KaladKaren sa kaniyang Facebook post.
"Gabi-gabi n'yo na po tayong mapapanood sa primetime newscast ng TV5- Frontline Pilipinas. Sa wakas, may transgender news anchor na sa PHILIPPINE NEWS!!! Happy Pride!"
"Maraming Salamat po TV5 President Sir Guido Zaballero and News 5 Chief Ma'am Luchi Cruz-Valdez! Kapatid x Kapamilya. TO GOD BE THE GLORY!"
Sa kaniyang Instagram post, nagpaabot naman ng pagbati ang Frontline Pilipinas news anchor na si Cheryl Cosim.
"Let's make history! See you on Monday!" anang Cheryl.
"Thank you Ate Yeng! I appreciate all your support po," sagot ni KaladKaren.
Kamakailan lamang, lumikha ulit ng kasaysayan si KaladKaren matapos niyang ipamalas ang angking-husay sa broadcasting, nang maging guest showbiz news presenter siya sa "Star Patrol" ng "TV Patrol," ang longest-running newscast program sa bansa, na flagship news program naman ng ABS-CBN.
Dito ay nakaharap niya ang hinahangaan, iniidolo, at ginagayang si Karen Davila na proud na proud sa kaniyang ginawa.
"MAMAAAA NASA TV PATROL PO AKO!!!!!! Isang pangarap na naman ang natupad. Salamat @tvpatrolph for making my dream come true! First transgender woman 'Celebrity Star Patroller' on TV Patrol and first transwoman to present segments in a Philippine primetime newscast," ani KaladKaren sa kaniyang Facebook post.
Bukod dito, nakagawa rin ng "first" si KaladKaren sa pinilakang-tabing bilang kauna-unahang transwoman na ma-nominate at manalong "Best Actress in a Supporting Role" sa nagdaang Summer Metro Manila Film Festival, para sa pelikulang "Here Comes the Groom."
Ayon sa ulat ng Balita, hindi kataka-takang mahusay talaga sa broadcasting si Jervi dahil siya ay nagtapos bilang "Magna Cum Laude" ng Bachelor's Degree in Broadcast Communication sa UP Diliman, at miyembro ng UP SAMASKOM (Samahan ng mga Mag-aaral sa Komunikasyon).
No comments:
Post a Comment