Tunog "nega" man, ipinaliwanag ni Jodi Sta. Maria na "nothing lasts forever" ang life lesson na nais niyang iwan para sa kaniyang anak, at maganda rin umanong paalala sa lahat.
Sa episode ng "Fast Talk with Boy Abunda" nitong Lunes, inalam muna ng King of Talk ang kuwento sa likod ng viral video na nakita ang anak ni Jodi na si Thirdy na sumasampa sa bakod.
Ayon kay Jodi, napanood din lang niya ang video at tinanong niya ang anak kung ano ang nangyari at sumampa siya sa bakod.
Si Thirdy ay anak nina Jodi at dati nitong karelasyon na si Pampi Lacson, na asawa na ngayon ng dating aktres na si Iwa Moto.
Ayon kay Jodi, nalaman niya na walang susi sa gate si Thirdy kaya napilitan itong umakyat sa bakod. Pero nagkaroon umano ng iba't ibang reaksyon ang netizens.
Pero pag-amin ng aktres, nag-aalala siya na baka maaksidente ang anak na puwedeng madulas at mabagok.
"Ang concern ko diyan baka mahulog, baka mabagok yung ulo. 'Yon talaga. Hindi yung na post, baka maaksidente," saad ni Jodi.
Kinausap daw niya ang anak at sinabihan na maging maingat.
"Baby you have to be very careful kasi kung biglang nadulas ka diyan ma-hit mo yung head mo sa floor, masakit sa puso 'yon," paalala niya sa anak na turning 18 na.
Dito ay tinanong naman ni Tito Boy kung mayroon na bang ipinakilalang girlfriend si Thirdy sa kaniya.
Sagot ni Jodi, wala pa.
Kaya naman tinanong din ang aktres kung ano kaya na magiging reaksiyon niya kapag may ipinakilalang girlfriend sa kaniya ang anak.
"Haaayyyy!," natatawang sagot ni Jodi.
Pero pag-amin ni Jodi, hindi niya talaga alam ang kaniyang magiging reaksyon pero hindi naman daw puwedeng gawin niya ang ginawa sa mga teleserye na parang kinikilatis ng tingin ang isang tao.
Ayon sa aktres, susuportahan niya lagi ang kaniyang anak sa mga desisyon nito. Ang mahalaga lang daw ay manatiling bukas ang linya ng kanilang komunikasyon.
Nais din niya na laging isipin ng anak ang mga paalala niya pagdating sa pag-ibig.
Isa na rin ang huwag liligawan ang babae kung wala siyang intensyon na pakasalan.
"Love is not a game," giit ni Jodi.
Pagdating sa life lesson na nais niyang iwan sa anak, sinabi ni Jodi ang kaniyang natutunan na, "nothing lasts forever."
Bagaman tunog nega, ipinaliwanag ni Jodi na magandang paalala ito para sa lahat na, "When great days come be grateful, savour the moment because it won't last forever."
At kung dumating naman ang bad days, "Don't fret, be hopeful because it won't last forever, it will pass," sabi pa ng aktres na inayunan ni Tito Boy. -- FRJ, GMA Integrated News
No comments:
Post a Comment