Nangyari na naman ba ang kapabayaan sa isang ospital kaugnay sa posibleng kaso ng pagkakapalit ng sanggol?
Possible case ng baby switching sa bayan ng Cagayan ang itinampok sa isang episode ng Kapuso Mo Jessica Soho (KMJS) kamakailan.
Dalawang bata kasi ang hinihinalang napagpalit sa isang ospital taong 2019.
Ayon sa Facebook page ng KMJS, sabay na nanganak ang dalawang ina noong Disyembre 2019 sa isang ospital sa Cagayan, ngunit habang lumalaki umano ang kanilang mga anak ay napuna nilang hindi raw nila kamukha ang batang nasa pangangalaga nila.
Sa taong kasalukuyan ay apat na taong gulang na ang dalawang batang lalaki.
Ayon sa pahayag ng lola ng isa sa mga bata, "December 6, 2019. Time na pinanganak 'yung apo ko. Binigay na nila sa akin ang bata, kinuha ko na pero nu'ng time na 'yun wala silang mga name tag. Tapos 'yung mga pamunas ng mga bata, nagkapalit."
Tinanong niya umano 'yung nurse. "Ma'am bakit po nagkapalit 'yung pinamunas sa mga bata? Hindi kaya nagkapalit din ang mga bata?"
Ang tugon umano sa kanya ay, "Bakit misis mas marunong pa kayo sa amin? Kami ang nasa loob."
"Sabi ng kaibigan ko, 'Bakit parang iba 'yung mukha ng apo mo?' Hindi ko na lang pinansin kasi wala nga din sa isip ko yung ganun," ani Lola Beverly.
Naluluhang salaysay naman ni Trisha na ina ng isa sa mga bata, nang makauwi ay iniyak niya raw lahat ng mga hinanakit niya. "Hanggang sa pinagsasabihan na akong nababaliw na ako. Kasi nga pinagdududahan ko 'yung sarili kong anak."
Sa kabila ng mga agam-agam, ibinuhos naman umano nila ang pagmamahal sa bata na lumaki namang makulit at malambing.
Gayunman, naroon pa rin yung bakas ng pagdududa lalo na noong lumalaki na ang bata.
"Yung bata po, bakit po wala siyang kamukha sa amin. Bakit po singkit siya, wala naman pong singkit sa amin. Nagdududa na ako. Mother's instinct po ba, na baka nga hindi talaga siya ang anak ko."
Wala daw silang makitang similarities sa physical features ng bata at sa kanilang mag-asawa at maging ang mga kamag-anak nila ay ganoon din ang sinasabi.
Dagdag pa niya, kaya hindi siya tumigil na maghanap sa nakasabay niyang nanganak.
Salaysay naman ni Marissa na ina noong isang bata, sa nakalipas na apat na taon ay wala naman siyang naging pagdududa kung anak nga ba niya ang iniuwi nila hanggang sa makatanggap siya ng mensahe mula kay Trisha.
"Sinabi nila na nagkapalitan kami ng baby. Hindi ko na po alam yung ano ang gagawin ko. Finorward sa akin yung mga pictures ng mga bata, saka pictures din ng parents."
At napansin ni Marissa ang tila malaking pagkakahawig ng bata sa kanya mismo at sa isa pa niyang lalaking anak.
Lumakas na rin ang kutob nila na baka nga nagkapalitan sila ng anak sa ospital.
Sinisikap nila ngayong malaman ang katotohanan matapos lumabas sa blood test na iba ang blood type ng magulang sa batang pinalaki nila. DNA test na ang kasunod para masagot ang lahat ng katanungan.
Samantala, bumuhos ang mga reaksyon at komento pagkat nagdulot ito ng pag-aalala sa iba pang magulang at parents-to-be at nagsisilbing paalala sa mga healthcare providers na maging mas maingat at tiyak sa kanilang mga ginagawa. Traumatic kasi ang mga ganitong pangyayari sa mga magulang, lalo't higit sa mga batang mapapawalay sa mga nakagisnang magulang.
Panoorin ang kanilang kuwento sa video na ibinahagi ng KMJS sa YouTube:
No comments:
Post a Comment