Padayon ang pakigbatok sa gobyerno sa ilegal nga droga sa tanang mga barangay sa tibuok nasud,  pamahayag ni PDEA Director General Wilkins M Villanueva diin maoy usa sa tumong sa gipahigayon nga panagtagbo alang sa PDEA Command Conference didto sa Dakak Park and Beach Resort nga gisalmutan sa tanang mga regional directors ug service directors sa tibuok nasud.

Gibutyag niini nga ang Dapitan maoy usa sa pinakaluwas ug komportable nga lugar busa gipili nga didto magtagbo ang tanang mga kadagkuan sa nasangpit nga ahensya.

Ang panagtagbo maoy pagsuta sa nahitabo nga kalamposan sa Philippine Drug Enforcement Agency (PDEA) sa mga lakang ilabina ang Barangay Drug Clearing Program diha sa War on Drugs ni Presidente Rodrigo Duterte ug target nga matapos sa dili pa kini mokanaog.

Sumala pa sa Director General nga dili masumpo ang droga kun adunay mga mogamit maoy hinungdan nga nag-umol sa mga intervention programs aron dili na mobalik sa paggamit ang personalidad nga nahilambigit niini.

Asoy pa nga nagagikan ang mga droga sa rehiyon sa gawas sa nasud ug sa kaulohan pinaagi na sa barko, sakay sa eroplano pinaagi sa mga couriers busa adunay K9 Intervention Unit sa gi-deploy sa mga pantalan ug airport.

Nagkanayon si DG Villanueva nga dako ang nahimo nga kalamposan sa lalawigan sa Zamboanga del Norte tungod sa koordinasyon sa uban pang law enforcement agencies ilabina sa tabang sa kapolisan ug LGU sanglit pipila lamang ang mga personahe sa PDEA.

Gani walay nahinagbo nga problema kabahin na sa LGU, "the key to success lies to the support of the LGU", niya pa.

Kabahin usab sa nahitabo nga Commonwealth shootout kaniadtong Pebrero 24 ning tuig, nagkanayon si DG Villanueva nga padayon pa gihapon ang imbestigasyon sa NBI diin maoy gipaabot aron mapasakaan og kaso ang mga sad-an sa maong panghitabo.

Nagpirmahay sa kasabutan alang sa insakto nga koordinasyon sa drug operation sila ni PNP Chief Guillermo Eleazar ug PDEA Director General Wilkins Villanueva aron dili na mahitabo ang susama nga "misencounter".

Kalambigit usab sa inter-agency drug information data base sa mga personalidad ilabina mga politiko nga nahilambigit sa guinadiling droga, gikatakda nga matapos na ang validation sa dili pa mahidangat ang bulan sa Oktubre diin gihimo kini sa mga naglangkob nga mga ahensya sa gobyerno pinaagi na sa PDEA, DILG, PNP, AFP ug MICA.

Nagpasalamat si DG Villanueva sa tanang kabarangayan sa Zamboanga del Norte sa pagtabang sa mga PDEA agents aron ma-implementar ang drug clearing operation.

Gipasalig usab niini nga walay mahilambigit nga mga personahe sa PDEA diha sa pagsupak sa balaud ug kon adunay impormasyon mahimong mopadangat sa ilang mensahe sa "ISUMBONG MO KAY WILKINS" pangitaon lamang ang Facebook page.

"Ang pagsulbad sa droga dili lamang paningkamot gikan sa kapolisan ug sa mga PDEA apan lakip na ang pagpakabana sa tibuok komunidad", panapos ni DG Villanueva.

(News and photo courtesy of CITY INFORMATION DIVISION- CID DAPITAN Facebook page)