Negatibo amin iti resulta ti RT PCR test dagiti sanga gasut sangapulo ket siam a pasahero ti maikadua a "regional flights" ti Phil. Airlines idi Hulio diyes a nagdisso iti Laoag International Airport.

Daytoy ti inpakaammo ni Gob. Matthew Marcos Manotoc iti inyuswatna a press briefing iti Bonsai Garden ti kapitolio probinsial.

Imbatadna nga agtultuloy ti panangakseptar ti probinsia kadagiti regional flights.

Maipalagip a ti kaunaan a regional flight a nagdisso iti LIA ket idi Hunio dose ken umabot iti sangagasut limapulo ket maysa dagiti pasahero.

Immun-unan nga inrakurak ti gobernador a masapul nga ag-quarantine nga umuna ditoy probinsia dagiti pasahero ken iti kanito a negatibo ti RT PCR test dagitoy iti panag-swab test da iti maikapito nga aldaw ket mabalinen dagitoy ti agawid iti maikasangapulo nga aldaw idinto a mai-isolate dagiti ag positibo ken masapul a maiyalud-ud iti sangapulo pay nga aldaw ti panagtalinaedda ditoy probinsia.
(Ronald Domingo, RPN DZRL Batac Correspondent)

(Source: Provincial Government of Ilocos Norte)