Responsableng pagmabdos maoy panawagan karon sa Provincial Health Office (PHO) hilabina nga gisagubang karon ang pandemya ug bisan paman nga dili malikayan ang mga temptasyon apan ang pagkontrolar niini magikan gihapon sa usa ka indibidwal.

Basi sa datos gikan sa PHO sa 1st quarter ning tuiga  adunay 270 nga natala sa tibuok lalawigan mga kaso sa teenage pregnancy nga adunay age group gikan 10 years old paingon 19 years old.

Basi sa datos ang Gingoog City maoy adunay pinakataas nga moabot sa 50; gisundan kini sa lungsod Balingasag, 44; Tagoloan, 42; Opol, 30; Villanueva, 28; Alubjid, 21;  Initao, 20; Claveria ug Jasaan, 17; Talisayan, 16; Salay, 9; Lugait ug El Salvador, 8; Manticao, 7; Lagonglong ug Medina, 3; ug Magsaysay, 1.

Walay natalang teenage pregnancy sa munisipyo sa Balingoan, Binuangan, Gitagum, Kinoguitan, Laguindingan, Libertad, Naawan ug Sugbongcogon.

Subay niini, giawhag ang tanang kabatan-onan sa lalawigan nga hugot nga magbinantayon sa mga kaugalingon nga makontrolar ang pagmabdos sa dili hustong pangidaron.

Lakip sa mga programa nga gitunol sa PHO mao ang paghatag lectures kalabot sa Reproductive Health kon diin ang mga personahe sa Rural Health Unit maoy responsible niini.

Lakip sa hisgotanan ang Enrollment on Family Planning sa mga teenage mothers aron malikayan nga masundan ang pagpanganak, lakip ang Creation of teen clinics or adolescent friendly centers matag RHU aron maawhag ang mga batan-on nga mangayo og tabang sa ilang health behaviors kon diin aron sila dili sab mahukman gumikan sa sayo nga pagmabdos.

Una na nga giplano kaniadto ang lig-on nga kampanya kalabot sa fertility ug reproductive health lakip ang ma-establisar ang mga teen centers aron matubag ang bisan unsa nga mga pangutana sa mga kabatan-onan. (Geo Denque, PIO)

(Source: Misamis Oriental Provincial Information Office Facebook page)