Nagpahibalo karun ang PhilSys Registration Center nga adunay mga sumbanan nga petsa sa mga kabarangayan nga magparehistro sa national ID system.

Nasayran gikan ni Local Civil Registrar Lucille Adasa nga base sa gihatag nga schedule sa PhilSys Registration nga ang 50 ka mga barangay gibahin sa lima ka cluster sugod sa Agosto 30 hangtud Setyembre 30 ning tuiga.

Gihatagan usab sa ilang schedules ang kapitan ug pito ka mga konsehales sa matag-barangay sugod karung Agosto 9 kutob Setyembre 23 sulod ning tuiga.

Samtang sa mga prayoridad nga mga barangay nga napahigayonan sa Step 1 o kadtong nakuhaan sa demographic data sama sa mga barangay sa San Francisco, Hilltop ug Tamion sa Agosto 9-14; mga barangay sa Tag-ulo, Carang ug Banbanan karung Agosto 16-21; Ba-ao, Maria Uray ug Guimputlan sa Agosto 23-28; ug Liyang, Oyan ug Aseniero sa Agosto 30 hangtud Setyembre 4.

Tumong niini aron dili magdasok ang mga katawhan nga magparehistro alang sa national ID system diin limitado lamang sa 180 ka mga katawhan sa matag-adlaw ang ilang pagaalagaran.

Alang sa mga naka-schedules nga mga barangay, ipahibalo ra kini kung moabot na ang gitakda nga petsa sa ilang mga barangay sanglit nagapadayon pa gihapon ang pagpangrehistro sa mga empleyado sa kagamhanang lokal ning syudad.

(News & photo courtesy of CITY INFORMATION DIVISION-CID Dapitan Facebook page)