Pinakahugot nga pulang saludo kag pinakamataas nga pasidungog ang ginahatag sang rebolusyonaryong mangunguma sa Panay para sa hangkilan nga Pulang Kumander sang New People's Army, Jorge "Ka Oris" Madlos, kag sa iya medical aide nga si Ka Pika. Pareho nga ginpatay sang mga talawan kag berdugong elemento sang 4th Infantry Division sang Armed Forces of the Philippines.

Ang Pambansang Katipunan ng Magbubukid-Panay kag ang katapuan sini gakasubo sa pagtaliwan sang isa sa mga pinakamaayo nga Pulang Kumander sang NPA, isa ka rebolusyonaryong kadre nga sa sulod sang masobra singkwenta ka tuig, naghalad sang iya kinaalam kag kinaadman para sa dungganon nga kawsa sang demokratiko nga rebolusyon.

Indi maayuan ang nangin papel ni Ka Oris sa pagdaku kag paglapad sang NPA sa Mindanao kag sa pag-uswag sang syensya kag arte sang inaway-banwa sa bug-os nga pungsod. Antes pa man sya ginpatay sang mga kaaway sang pumuluyo, linibo ka Pulang kumander kag Pulang hangaway na ang iya nadebelopar. Kag ang iya kabuhi kag baganihan nga kamatayon magaserbi nga inspirasyon para sa tanan nga rebolusyonaryo nga ipadayon sang may kakahas kag determinasyon ang rebolusyonaryong kawsa.

Ang demokratiko nga rebolusyon sang banwa nagatuyo nga maghilway sa sahing mangunguma halin sa gapos sang kaimulon kag pagpanghimulos sang agalon nga mayduta. Nagatuyo ini nga dulaon ang monopolyo sa duta paagi sa armadong paghimakas. Kag ang NPA, sa idalum sang absoluto nga pagpamuno sang Partido Komunista sang Pilipinas, ang pinakamasaligan nga armadong kusog sang pumuluyo agud dal-on sa kadalag-an ang rebolusyon.

Tinalakay ng mga kasapi ng Pambansang Katipunan ng mga Magbubukid sa isang baryo sa Panay ang parangal ng Komite Sentral ng Partido Komunista ng Pilipinas para sa dakilang bayani at Pulang kumander ng Bagong Hukbong Bayan na si Ka Oris.

Gani, indi katingalahan nga ang sahing mangunguma ang busay sang mga Pulang hangaway kag Pulang kumander. Ang NPA, sa kadam-an sang katapuan sini, ginabug-usan sang pinakamaayo nga mga inanak sang sahing mangunguma kag pungsudnon minorya.

Bangud sini, ang kabuhi kag kamatayon sang mga kaangay ni Ka Oris isa ka daku nga bagay para sa amon nga mga mangunguma.

Mas mabug-at pa sa bukid sang Madia-as ang imo kamatayon, Ka Oris. Ang inspirasyon sang imo tumalagsahon nga kabuhi mas madalum pa sa Suba sang Pan-ay. Amo ini ang hugot nga uyatan sang rebolusyonaryong mangunguma nga Panayanon, bilang ubay kag iwag sa maliko kag tunukon nga banas pakadto sa kahilwayan.

Mabuhi ka, Ka Oris, hangaway sang dayon! Ikaw nga buhi sa taguipusuon sang mangunguma nga naga-alsa; ikaw nga buhi sa kada handus namon sa dughan sang kaaway.

Isulong ang demokratiko nga rebolusyon sang banwa!
Padayon ang inaway-banwa tubtob sa kadalag-an!

Mabuhi ang New People's Army!
Mabuhi ang Partido Komunista sang PIlipinas!
Mabuhi ang pumuluyong Pilipino!

 This free site is ad-supported. Learn more
​