Dalaga na talaga ang isa sa pinakasikat na child stars ng 2010s na si Jillian Ward. Matapos niyang sumikat sa role na Trudis Liit noong 2010, ngayon ay nakatakda na siyang gumanap bilang isang doktor sa bagong teleserye ng GMA Network.
Unang beses na bibida si Jillian bilang isang teen actress sa Afternoon Prime inspirational series na "Abot-Kamay na Pangarap." Gaganap si Jillian bilang Analyn, isang anak mahirap na makapagtatapos ng pag-aaral at magiging doktor.
Makakasama ni Jillian sa nasabing serye ang aktres na si Carmina Villaroel na gaganap na kanyang nanay na 'no read, no write 'at may suliranin sa pagkatuto. Iikot ang kuwento sa mag-ina na magkaiba man ang estado ng pag-iisip ay mayroon namang iisang pangarap—ang umunlad ang pamumuhay.
Ayon kay Jillian na isa sa gino-groom ngayon ng GMA Network bilang pinakabago nilang leading lady, hindi maiwasang makaramdam siya ng kaba sa napakalaking role na ipinagkatiwala sa kanya. Nagkaroon man ng top-rating show si Jillian noong 2019 at 2020 na Prima Donnas na napanood rin sa afternoon timeslot, iba raw ngayon dahil wala na siyang kahati sa lead role.
Nakasama ni Jillian sa nasabing show ang mga kapuwa teen stars na sina Sophia Pablo at Althea Ablan na bibigyan na rin ng GMA ng kani-kanilang titular roles.
Maliban sa ito ang unang starring role ni Jillian, nakadaragdag sa kanyang kaba na marami siyang beteranong mga artistang kasama tulad nina Carmina, Richard Yap, Dominic Ochoa, at Pinky Amador. Lagi raw niyang tinatanong sa taping kung tama ba ang emosyong ibinibigay niya sa bawat eksena. Mapalad naman daw siya na makahanap ng mentor sa mga kasamang aktor.
Isa rin umano sa paghahandang ginawa ni Jillian ay ang pagkabisado ng mga linyang may kinalaman sa medisina. Hindi raw ito nagging madali dahil napakaraming bagong salita ang ngayon niya lang natuklasan ngunit kailangang sabihin sa mga eksena nang may kompiyansa.
Isa ring sikat na pangalan si Jillian sa social media. Kamakailan ay ibinahagi ri niya ang bagong bili niyang sasakyan. Marami din ang nagsasabing si Jillian ang magmamana sa titulong Primetime Queen mula kay Marian Rivera na isa sa mga idolo ng teen actress.
No comments:
Post a Comment