Walang snow sa Pilipinas? Walang problema para sa mga batang Pinoy noon na kayang-kayang gumawa at magsaya sa "snow" gamit lamang ang styrofoam.
Sa post ng Facebook page na Batang Pinoy-Ngayon at Noon, bumalik sa kahapon ang mga social media users habang inaalala ang mga panahong napasaya sila nang sobra ng paglalaro ng "improvised snow". Imahinasyon lamang ang puhunan, hindi na lugi dahil styrofoam lang ang kailangan, bukod sa pader na kanilang pagkakaskasan nito.
"Nag-uunahan kaming maubos ang styrofoam sa pagkaskas sa pader dapat," kuwento ng netizen na si C. Dela Cruz. "Iyong magaspang dapat para maubos kaagad tapos iipunin namin at saka ihahagis paitaas para kunwari umuulan ng snow pagbagsak nito."
"Ganiyan lang dati pero masaya na kami. Hahaha!" kuwento ni Y. Senar. "Kahit tirik ang araw, basta iyan ang laruan namin, talo pa ang winter sa Korea!"
"Aakyat ka pa sa mataas na pader para habang bumabagsak at inililipad ng hangin. Snow na snow," wika ni D. Morado.
Pero kung sila raw ay tuwang-tuwa, ang kanilang mga magulang at kapitbahay na matatanda naman daw ay inis na inis sa kanila dahil sa kalat mula sa paglalaro nila nito. Bukod sa maraming maliliit na piraso, mahirap din walisin dahil masyadong magaan at napakadaling tangayin ng hangin.
"Maliban sa snow, inuulan din kami noon ng sigaw ng mga galit na kapitbahay," pag-alaala ni R. Tom.
Ayon naman kay J. Vicencio, kung masaya sila noon maglaro, ngayon ay nauunawaan na niya ang mga hindi natutuwa sa kanilang ginagawa noon.
"Ngayon, naiintindihan ko na kung bakit nagagalit sa amin ang mga nakatatanda noon kapag nagkikiskis kami niyan."
Makalat nga naman talaga, hindi ba? Ikaw, nakapaglaro ka rin ba ng pekeng snow na ito noon? Bukod sa masasayang alaalang dala nito, naiintindihan mo na rin ba ang punto ng mga sumasaway dati sa inyo?
No comments:
Post a Comment