Nagsusuot ka rin ba dati ng "mahiwagang kuwintas"? Ang maliliit at pahabang mga lalagyan na may lamang makukulay na liquid at madalas na itinitinda sa labas ng paaralan noon?
Bukod sa identification (ID) card, may iba pang nakasabit sa leeg ng mga mag-aaral kapag pumapasok sa paaralan noong 1990s. Usong-uso rin kasi noon ang maliliit na sisidlang bote na mayroong may kulay na liquid sa loob, na madalas ay ni hindi alam ng mga batang mismong nagsusuot kung ano ba talaga ang nilalaman.
Sabi ng iba, cologne o pabango ang laman nito. Ang iba naman na mas malawak ang imahinasyon ay naniniwalang "love potion" ang mga ito.
Sa post ng Facebook page na Batang Pinoy-Ngayon at Noon, binalikan ng marami ang mga sandaling hindi nila nakalilimutang isuot ang kanilang "mahiwagang kuwintas" at naniniwala pa sila sa pakinabang nito, bilang pabango man o bilang "gayuma" sa kanilang mga nagugustuhan.
"Akala ko noong dati may kapangyarihan ang laman niyan kasi 'yong mga napanonood ko noon 'yong mga kuwintas nila na may kapangyarihan," komento ng netizen na si C. E. Rine.
"Isinusuot ko 'yan noon kapag inuutusan ako ng mama ko sa gabi, tapos feeling ko hindi ako malalapitan ng aswang dahil suot ko 'yan," pagbabahagi ni C. J. Ruamar.
"Ang pagkakatanda ko riyan, 'yan ay isang love potion na 'pag naamoy ka ni crush eh maghahabol na siya sa iyo. Kaya noong suot ko 'yan, feeling ko ako talaga tinitingnan ni crush," ani D. Richnel.
"Love poison daw tawag diyan. Madami raw magkaka-crush kapag nagsuot ka," wika ni M. Guevara.
Kuwento naman ni D. Ramos, "Sabi ng kaibigan ko noong bata pa ako, 'Kapag suot mo 'yan, lalapit sa iyo ang crush mo. Kaya bumili ako ng ilang piraso noon."
Nagsuot ka rin ba nito? Ano ang hindi mo makalilimutan sa mga kuwintas na ito?
No comments:
Post a Comment