Marami ang nagulantang sa pasabog ng beteranang aktres na si Dina Bonnevie sa January 31 episode ng "Fast Talk with Boy Abunda" dahil hindi sukat akalain ng lahat na diretsahan at "no holds barred" na sasagutin nito ang mga tanong ng King of Talk.
Naungkat nga ni Boy ang tungkol sa viral video ng aktres kung saan natanong siya ng press kung nakaranas na ba siyang magkaroon ng katrabaho na "primadonna."
Dito nga ay nagsalaysay ng kaniyang karanasan ang premyadong aktres sa kung paano niya pinatikim ng kaniyang taray ang naturang aktres na madalas late at unprofessional sa kanila, ayon na rin sa naunang ulat.
Walang tinukoy na pangalan si Dina subalit nagkakaisa ang mga netizen na ang tinutukoy niya ay si actress-TV host-vlogger Alex Gonzaga.
Bagama't noong 2018 pa pinag-usapan ang naturang viral video ng panayam sa press, muli itong nabuhay dahil sa naging podcast episode naman ni Alex na pinamagatang "I Am Always The Bad Guy" kung saan ikinuwento niya ang naging karanasan sa isang "artistang matanda," na aniya ay namahiya sa kaniya sa set.
Mabilis naman itong napagtagni-tagni ng mga netizen sa naging blind item ni Dina. Naniniwala ang lahat na iisang tao lamang ang inilalarawan nila: ang isa't isa.
Natanong ni Tito Boy kay Dina kung ano ang naramdaman niya sa pinag-usapang podcast episode ni Alex.
Tugon ni Dina, sa totoo lamang daw ay maraming umuudyok kay Dina na magsalita na at sagutin si Alex dahil sa "kabastusan" nito.
Giit ni Dina, hindi naman daw siya nasaktan sa ginamit nitong salita dahil talaga naman daw na matanda na siya. 61-anyos na kasi ang batikang aktres.
"It's true, matanda na ako, I'm 61. But I see people at 61, they're still looking fresh. Sorry, but I feel fresh, and I think I look fresh. Hindi ako na-offend doon," paliwanag ni Dina.
Sa ibang sinabi raw ni Alex na-offend si Dina.
"Kaya ako nagulat na bakit dumating 'yung parang matandang artista when you're painted as the bad guy. For me, doon ako nainis. Kasi 'painting you as a bad guy' is inventing stories to make you look bad. But I wasn't inventing stories."
Ayon sa ulat ng Balita Online, nilinaw ni Dina na nakalipas na iyon at kaya lamang siya nagsasalita ay dahil nauungkat at patuloy na nakakalkal.
Wala rin aniya siyang galit kay Alex. Sa katunayan ay nagkita na ulit sila nang minsang mag-guest siya sa "Lunch Out Loud" (Tropang LOL ngayon). Naging maayos raw ang pakikitungo sa kaniya ni Alex.
"But that's past. It has changed. Nagbago naman siya bago matapos ang taping. Okay, hindi ako galit sa kaniya," dagdag pa ng aktres.
Habang isinusulat ang artikulong ito ay wala pang tugon, reaksiyon, o pahayag ang kampo ni Alex hinggil sa isyu.
No comments:
Post a Comment